Shillong:U bah Anthony Nongbri u la pyniasoh ialade ryngkat ki nongkyrshan jong u sha ka seng NPP bad la pdiang burom ia u da ki nongialam ka NPP ha ka ophis jong katei ka seng kaba don ha Lachumiere. U bah Anthony u la leit iasoh sha ka seng NPP ban ia khun ia ka elekshon MDC na Laitumkhrah konstitwensi hadien ba u la shah pynduh tiket ha ka UDP, ka seng kaba u la don slem slem bha bad kaba u la bat ruh kum u Joint Secretary jong ka UDP Shillong City. U la wan pyniasoh sha ka NPP ryngkat ki nongkyrshan jong u kiba dei na ka seng Congress, UDP nalor ki NPP kiba la don lypa.
La pdiang sngewbha ia u bah Anthony da u Working President ka NPP u Dr.Don War uba la iaroh ia ka jinglong babha une u samla da kaba ong ba bun bah kiba la ithuh ithaw ia une u samla kin kubur ia ka jinglong sngewrit, jemnud bad shitrhem jong u ha kaban trei na ka bynta ka imlang sahlang ha ka lynti ka ba beit bad bakhuid. Ha kajuh ruh ka por u la ong ba ka parti NPP kan nang khlain da ka jingdon kum kine ki khun samla rangbah ki ba don ka nongrim baskhem ban ai ka jingshakri babha ia ka Constituency, ia ka Ri bad ka jaitbynriew.
Ha katei ka jingialang pdiang burom la pynskhem ruh ia ki nongkitkam jong ka NPP 16-East Shillong Block Committee kaba la ialam mynta da u bah Anthony kum u President. Ia ka jingialang pdiang burom ha kane ka sngi la pyniaid da u bah Kupar Blah President ka NPP Shillong City.Ki nongkitkam kiba la pynskhem ki kynthup ia u bah P. Lyngdoh (Working President), bah D. Lyngdoh bad bah M. Kharmujai (ki Vice-President), bah H.Syiemlieh (General Secretary) bad kiwei pat.