Rung NPP ki nongkyrshan bad nongialam ka UDP, Congress bad MCPC

Nongpoh:Ha ka sngi kaba ka NPP Mawhati, ka la pynlong ia kawei ka jingialang na ka bynta ban pyni thuh ia ki nongialam na ki Circle bapher bapher hapoh ka Mawhati Constituency bad ruh ban pdiang burom ia kito kiba rung sha ka NPP, la mih ka sur ba ha kane ka ilekshon 2023 na Mawhati, ba kin kyrshan tyngeh ia u Bah Shemphang Lyngdoh, kyrtong ka NPP na Mawhati Constituency.

Lyngba katei ka jingialang kaba la long ha Mawlasnai, ki la don shibun ngut ki na kiwei ki Party ha Mawhati Constituency, kiba kynthup ia ki nongialam bad nongkyrshan ka UDP, Congress, MCPC lem bad kiwei, ki la leit ban pyniasoh noh ialade sha ka NPP, ia kaba la pdiang sngewbha da u Bah RM Mukhim, uba dei u Working President ka NPP ha Mawhati bad Ri Bhoi Distrik, kata ha ka jingdonlang kiwei ki heh nongialam ka NPP Mawhati.

Na katei ka jingialang, kitei ki nongkyrshan na kiwei na kiwei ki Party, ki la pynpaw ba ka jingleit pynïasoh NPP jong ki, ka dei namar ba ki ishaniah eh ia ka NPP bad kaba la pynshohbiej eh ia kitei kiba la leit pyniasoh sha ka NPP, ka dei namar ka jinglah jong kane ka sorkar kaba mynta, ia kaba la ialam da ka NPP bad kaba la lah syndon ban pynurlong ia ka surok na Umsning-Sonidan.

Nalorkata, ki la don ruh kiba la kren, ba ka jingkmen eh ia kitei ki paidbah ka Mawhati Constituency bad kaba la pynlong ia ki ban pyniasoh sha ka NPP, namar ba ka dei ka sorkar kaba la nud ban shim ia ka sienjam ban shim ha ka ban pynbeit ia u pud u sam ha kito ki jaka ba shait jia ki kam iakajia pud hapdeng ka Meghalaya bad Assam.

Haba phai halor katei ka jingialang, ka long ba ha kaba sdang ka la don ka jingpynithuh bad ka jingpynskhem ia ki nongkitkam ka NPP na ki Circle bapher bapher hapoh katei ka Constituency bad hadien kata pat, ka la don sa ka jingpdiang burom ia ki nongialam bad nongkyrshan na kiwei ki Party bad kiba la kwah ban pyniasoh noh ialade sha ka NPP
Lyngba jong katei ka jingialang, ki riew rangbah na ki shnong kiba hap ha Mawhati bad kiba la ai jingkren ha katei ka sngi, ki la shim ia ka rai ba kin trei shitom, na ka bynta ban kyntiew shuh shuh ia ka NPP hapoh katei ka Constituency bad khamtam eh ban pynjop don burom ïa u Bah Shemphang Lyngdoh.
Kiwei ki nongkyrshan na kiwei ki Party kiba kynthup ia ka Congress, UDP bad MCPC, ki la pynpaw ba ka jingleit pynïasoh NPP jong ki, ka dei namar ba ki ishanniah eh ia ka NPP bad ba ki la iohi ba ka dei ka Party ka bym ju don ka jingiania hapdeng ki nongialam ka Party.
La sakhi ia katei ka jingialang, da ka jingdon ki heh nongialam ka NPP Mawhati, kiba kynthup ia u Bah RM Mukhim, Working President ka NPP ha Mawhati bad Ri Bhoi, u Bah Otril Pamshong, MDC barim ka Mawhati lem bad shibun kiwei.