Shillong: Ka YBSC Shella ka la rung sha ka phainal jong ka 5th Mawryngkneng Invitation Knockout Football Tournament-2019, hadien ba ka la lah ban pynliem ia ka Breaveheart FC kaba na Mawryngkneng ha ka 19 tarik Risaw sngi saitjain.
Ka jingialehkai ka long kaba itynnad namar baroh ar tylli ki teams ki long kiba khlain bad ia ryngkat bor. Ha ka jingiakhun baroh artylli ki team ki lah ioh bun tylli ki kabu ksiar ban thep kol hynrei ka jingtbit jong ki rangap kol baroh artylli ki team ban iada na ka jingshah thep kol ka la pynshoh biej ia ki nongpeit kai. Dei ha ka 28 minit u player ba tbit jong ka YBSC, u Figo Syndai uba la pynshad bad buh bha ia ka bol ha u P Kharbih ba thep ia ka kol nam jam na ka YBSC ha ka kylla step.
Haba wan phai sha ka kylla miet, ka Breaveheart ka la nion tyngeh ia ka YBSC hynrei ka jingtbit jong u rangap kol ka YBSC ban kyrda na ka jingshah thep kol ka la pynshaiong ngain ia ki nongkyrshan jong ka Breaveheart bad tad haduh ba kut ka minit ba 88 bad ar minit shwa ban pynwai ia ka jinglehkai ka Breaveheart ka ioh ban pyniakhaid lyngba ka penalty haba u player ka YBSC u la pynur ia uwei u player ka Breaveheart ha phyllaw kol ba u referee u la ai da ka penalty bad ia kane ka kabu la thep da u B. Wahlang.
Ka jingialehkai ka la kut ha ka jingiakhaid da 1-1 bad u referee u la pyniakhun da ka extra time ban ioh ia ki nongjop bad ha ka kylla step ka extra time yn don ba thep kol, dei ha ka kylla miet jong ka YBSC ka la ioh ban thep ia ka kol nam tam lyngba u Emerson Nongrud ha ka minit 115 bad ban pyntikna ia nam jop bad u Shanbor Jyrwa u la thep ia ka kol ba khatduh ha ka 120 minit. Ha kane ka jinglehkai u Figo Syndai ula ioh rah ia ka nam Man Of the Match.
Da kane ka nam jop ka YBSC Shella ka ioh rung sha ka final jong ka 5th MIFKT 2019 bad kan iakhun pyrshah ia ka Pomlahier SC ha ka 26 tarik Risaw ka sngi iew ha ka por 1:30 janmiet ha Mawryngkneng Stadium.
Haba phai ha ka jingialehkai Mawryngkneng Super Cup ka Pomlahier SC ka la ioh rung sha ka final hadien ba ka la pynliem ia ka Mawmang SC lyngba ka tie-breaker bad kan iakhun pyrshah ia ka Thad Nongtyrkhang Nonghali ha ka por 11:30 mynstep ha ka 26 tarik Risaw ha madan Stadium Mawryngkneng.
Phi don ban ong eiei?