Rung ka Bill ban jied Rangbah Shnong ha dorbar ka KHADC

Shillong, 29 Risaw:
Ka iing dorbar jong ka KHADC ka la mynjur ban wanrah ia ka ain thung Rangbah Shnong kaba la tip kum ka Khasi Hills Autonomous District (Village Administration) Bill, 2013 hynne ka sngi ba dei ka sngi bas dang ka dorbar.
Ia kane ka Village Administration Bill, 2013 la wanrah ha ka dorbar da u EM ba peit ia ka Elaka u Bah Lamphrang Blah bad yn iatai ia kane ka Bill ha ka 4 tarik Naiwieng ban wan kaba dei ka sngi kut artad ka dorbar.
Ia kane ka Bill la pynkhreh da ka Select Committee ba la thung ha ka dorbar kaba la dep hadien ba ki MDC ki la rah ia ka jingujor ia ka jingthmu ban pas ia kane ka Bill.
Kane ka Bill jong ka KHADC, ka thmu ban pynlong da ka elekshon ban jied ia u rangbah shnong bad kan long ruh ka ain ban ithuh ia ka dorbar shnong ban pyniaid katkum ki kyndon ba la pruid dak ha kane ka ain.
Ha kajuh ka por, la wanrah ruh ia ka jingpynkylla ia ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) (Second Amendment) Bill, 2012.
Ka KHADC ka la pyrshang ban pynkylla ia ka Section 20 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnongs of Mylliem Syiemship) Act, 2007 ban plie lynti ia u myntri ka hima Mylliem u Bah Mahindro Rapsang ban iakhun ia ka elekshon 2013 khlem risain shwa na ka kam.
Hynrei namar ba ym lah ban pas ia kane ka Bill, u Bah Rapsang u la hap ban risain noh na ka kam myntri ban iakhun ia ka elekshon.