Rung jubor ki KSU ha kamra U CEM JHADC

Jowai, 19 Risaw:
Mynta ka sngi ki nongialam ka KSU Jaintia Hills District Unit ki la rung jubor shi syndon ha ophis jong u CEM ka JHADC hadien ba une u CEM u la kyntait la bun bun sien ban ia kynduh iaki dkhot ka KSU Lakadong Unit.
Katkum ka jingiathuh jong ki nongialam ka KSU JHDU la  ong ba ki nongialam ka KSU Lakadong Unit ki la  wan la bunsien bha sha Jowai naka bynta ban thmu ia kynduh ia u CEM ban ioh iakren halor ka jingdawa ban kylla kyrteng iaka thanat kaba la thmu ban buh haka shnong Lakadong ia kaba la  ai kyrteng Lad Lakadong Police Outpost haka jaka ban ai tang Lakadong Police Out Post, hynrei kane ka jingthmu ka jong ki, ka la pulom noh tang namar ba u CEM u la leh bunkam bad kyntait ban iakren bad ki.
Kumta halor kane ka jingbymkhein snep iaki dkhot katei ka Unit da u CEM ka JHADC, naka liang ki nongialam ka KSU JHDU hapoh ka jingialam u Samla N.Sutnga Finance Secretary ka KSU JHDU bad Samla Justice Paul Lyngdoh Asst Education Secretary ka KSU JHDU kila pyrshang ban leit ia kynduh ia u CEM hynrei naka liang u Peon jong u CEM ula ong ba u CEM u dang don meeting. Ha kaba nyngkong ki nongialam ka seng ki la kohnguh,  hynrei hadien shikynta ki la  wan biang bad ki la ioh iakane ka juh hi ka jubab. Kumta naka liang ki nongialam ka KSU kila rung syndon daka  bor shapoh ka kamra u CEM bad hapoh kamra u CEM lalap iaki katto katne ki hehspah bad u Ex CEM barim ka JHADC u Madonbai Rymbai.
Hadien ba La ioh rung ki dkhot ka KSU shapoh kamra, ka la don shwa ka jingiatainia hapdeng u CEM bad ki dkhot ka KSU hynrei ha kaba khadduh u CEM ula pyndem toin bad ula iakren syndon bad ki dkhot ka KSU shaphang kata ka kam jong ki dkhot ka KSU Lakadong Unit hakaba ula Kular ruh ban shimkhia syndon iaka jingdawa ka seng.