rRai pyrshah High Court ki Rangbah Shnong Kin bteng beit ban ai syrnod ia ki nongshong shnong

Shillong, 1 Rymphang:
Ka jingialang jong ka Synjuk Ki Rangbah Shnong ha kane ka sngi Saitjain ka la shim ia ka rai ban bteng beit ban ai syrnod ia ki trai shnong kano kano ka shnong haba ki donkam.
Kane ka rai jong ka SKRS ban bteng ia ka jingai syrnod ia ki nong shong shnong ka long hadien ba ka kashari High Court ka Meghalaya ka la pynmih ia ka rai ba ki Rangbah Shnong kim lah shuh ban ai syrnod.
“Ia mynta, la iathuh ba bun bah ki nongshong shnong ha ki shnong bapher bapher ki wan pan syrnod na u Rangbah Shnong kum ka syrnod jaka sah, ban plie bank, ban pan bording na MeCEL”, la ong u president ka SKRS u Dr Werlok Kharshiing haba kren ha kane ka sngi Saitjain hadien ba la wai ka jingialang kaba long ha Community Hall ha Jaiaw Lumpyllon.
“Ki briew kiba donkam hok ia kine ki syrnod ki iakynduh jingeh namar ba bun ki Rangbah Shnong kim treh shuh ban ai syrnod hadien ba la pynmih ka Kashari ia ka hukum”, la ong u Dr Kharshiing.
U President ka SKRS u la ong ba ki la shim ia kane ka rai ban bteng ban ai syrnod na ka bynta ka jingbit jingbiang jong ki paidbah.
Ha kajuh ka por, u vice president ka SKRS u Bah H Syiem u la iathuh ba haduh mynta ki rangbah shnong kim pat ioh pdiang ia ka hukum na ka kashari kaban bthah ia ki Rangbah Shnong ban sangeh ban ai syrnod.
“Ki Rangbah Shnong kim iohi kano kano ka kopi ia ka rai ka Kashari. Ngi shu tip ia ka rai ka Kashari na ki kot khubor”, la ong u Bah Syiem.