rPdiang U Lat ia U MDC shu sieh ha KHADC Mar 15ngut, ia khaid ka ARPA bad ka PDC

Shillong,
26 Rymphang:  
Da ka jingpynskhem ka sorkar jylla ban sieh MDC ia u President barim ka Youth Congress u Bah Gabriel Wahlang, ka jingdon briew jong ki ar kynhun ka ARPA ka liang synshar bad ka People Democratic Front (PDF) ka liangpyrshah ka la long mar katjuh, kata mar 15 ngut ha ka iing kaba 30 ngut ha KHADC.
Ka thymmei khubor ha kane ka sngi Palei, ka la ong ba u Lat ka jylla u Keshari Nath Tripathi u la pdiang ia ka jingthung ia u Bah Wahlang kum u MDC shu sieh ha KHADC.
Katkum ka thym mei khubor, ka jingbam smai jong u Bah Wahl ang ka lah ban long ha ka sngi Thohdieng.
Kane ka jingia khaid number hapdeng kine ki ar liang mamla ha KHADC, kan wanrah ia ka jingkhih phaloh kaba jur bha ha ka Council.
Haba iakren bad u nongialam liangpyrshah u Bah Process T Sawkmie u la ong ba ki MDC ka liangpyrshah kin don ka jingialang hadien ba la kut ka dorbar ka KHADC ha kane ka sngi Thohdieng ban iakren ia kane ka kam sain pyrthei bad ban iaid shakhmat.
 ”Ngin leit iakynduh ia u Lat ban pynsangeh noh ia kane ka Executive Committee namar ba ka liangsynshar kam don shuh ka jingbun paid.  Ngin dawa ruh ban thung da ka jingsynshar Administrator” la ong u Bah Sawkmie.
Lah ban kdew ba u nongialam liangpyrshah ula pyrshah ia ka jingthmu ban pynwai ia ka dorbar ha kane ka sngi Palei bad halor kane, ka chairperson ka Kong Teilinia Thangkhiew ka la pdiang ban pynkut ia ka dorbar kumba la dep buh kata lashai ka sngi Thohdieng.