Rong u lapbah, ia 2 ki jingkieng ha Thangbuli

Shillong, 5 Jylliew:
Ka shnong Thang buli kaba jngai kumba 25 km na Jowai ka la mad ia ka jingwan lyngshop ka mariang ha kaba ka eriong kaba jur bad u lap bah lap san, ki la khyrwit ia katei ka shnong. Kane ka jingwan jong ka eriong bad u lapbah ba jur  ka long ha ka  miet 1 tarik u jylliew.
 Ka jingjulor kaba kham kongsan ka long ka jingshah pynkhyllem noh ki jingkieng iaid kjat kaba ha ka wah Amsyiar bad wah Amsyrbua kiba don hapoh ka Raid Buam Amlarem Subdivision War Jaintia. Da ka jingjur u lapbah ha ka ka miet u la lah ban pynheh pynksan ia ka wah haduh ka  la lah ban pynkdiah ia kine ki ar tylli ki jingkieng. Kine ki jingkieng iaid kjat ki long ki ba donkam haduh katta katta khamtam ia ki nongrep kiba ju leit ju wan ban jam shilliang na ki ne  ki Wah. Donbok ba ha kane ka miet kam don eiei ka jingjia kaba sngewsih ia ki paid nongshong shnong.
Kane ka buh ka jingeh kaba khraw ia ka shnong khamtam ia ki nongrep kiba la duh noh iakine ki jingkieng ban leit ban wan sha lyngkha rep jongki. Namar kata la kyrpad jur ia ki bor Sorkar kiba dei peit ia kane ba kin sngewbha ban shim khia ban ai ki lad jingiarap naka bynta ban tei biang ia kine ki jingkieng namar lada ymdon shuh kine ki jingkieng kan wanrah ka jingeh kaba khraw shi katdei eh ia ki nongrep, pynkut na u Ma Donbok Buam GS Raid Buam Thangbuli- Umladkhur.