Rong ka twa ia saw ngut ha Ratacherra

Shillong, 14 Jylliew:  
Saw ngut ki briew ki la khlad hadien ba ka iing jongki kaba ki dang don ka la shah rong ha ka twa ha Ratacherra jong ka East Jaintia Hills. Ar ngut kiwei pat ki la mynsaw namar ka jingtwa jong ka khyndew kaba la jia hadien ba la jur u slap ha Ri- Lum Jaiñtia.
La iathuh ba kane ka la jia ha ka sngi Sait jain ha ka por 5 baje duna eiei janmiet, ha kaba uwei u lum, u la twa kynsan bad hap sha surok bah -44.
Kane ka jaka ba twa  ka dei hapdeng ka shnong Tongseng bad Rattachera markhap bad ka jylla Assam. Ka jingjur u slap ka la pynsahkut ia ki kali ba iaid na Guwahati- Shil long sha Silchar.
La iathuh ba ka jingtwa une u lum ka la pynsahkut ia ka surok bah bad rah syndon ia ki longïing kiba don hajan katei ka surok shapoh ka riat kat haduh ba ki saw ngut ki briew ki la jah hynrei ym pat lap ia ki haduh mynta. Na kine ki saw ngut kiba la shah rah ha ka khyndew,  lai ngut ki dei ki kynthei bad uwei u shynrang.  Ar ngut kitei ki kynthei, ki dei shi kmie shikhun kiba sah lang ha ka juh ka ïing kaba la shah rah ha ka khyndew, kawei pat ka dei bar jylla kaba dang ap kali ban leit sha Assam bad uwei u shynrang uba dei na Rattachera u dang iaid lynti mynstep bad ar ngut ki la mynsaw jur.