Rong ka khyndew ia 5tylli ki iing, iap 6ngut

Umiam, 18 Jylliew:
Ka jingiap na ka jinghap khyndew hynnin ka sngi, ka poi sha ka 6ngut baroh bad kitei ki kynthup ia 5ngut ha Umiam, ha kawei ka dong kaba la tip kum ka Tharia, Ri Bhoi District bad iwei i khyllung ha Lum Kyntung, Umtyngngar, ka surok ban leit sha Sohra.
Ha Tharia, la lap mynta ka sngi, ia ka met iap jong kawei ka longkmie, kaba don 52snem ka rta bad kaba kyrteng ka Sita Lama. La lap ia katei ka met iap, ha ka por 12baje nohsngi mynta ka sngi.
Ha katei ka jinghap khyndew, kaba la jia ha ka por 5baje hynnin mynstep, ki don 4tylli ki iing, kiba la shah rong noh, na ka jingtwa, ha kaba ki iing lynter, ki la shah rong ha ka jingjngai antad, kaba haduh 50phet eiei shathie shatem. Kiba khlad bad kiba la lap ia ki met iap jongki, hynnin ka sngi, ki long ka Shanti Lama 14 snem, u Loboji Mohonto 25 snem, Runa Lama 19 snem, Krishna Lama. La iathuh ba kitei kiba iap bad mynsaw na ka jinghap khyndew ha Tharia, ki dei kiba trei ha ka karkhana ot dieng jong U Harikshon Jain.
Kiba mynsaw ha kane ka jingjia ki kynthup ia u Sing Lama 70 snem, u Suresh Lama 25 snem, ka Seema Sharma 26 snem,ka Lapa Lama Bhutia 42 snem, u Amudla Dewry 43 snem, u Chandan Pasmi 42 snem, u Yan Kumar 5 snem, bad u Umesh Sharma 9 snem.
Ha kawei pat ka jingjia, la iathuh ba iwei i khyllung kynthei, iba 2 snem ioh bnai, iba kyrteng Larisha Sohtun, i la khlad noh, na ka daw ka jingban ka khyndew ia ka iing kaba sah ha kawei ka sharing lum ha Lum Kyntung, kaba hap ha Umtyngngar, ha ka surok ban leit sha Sohra. Ka jingtwa khyndew, ka la jia ha ka por 3.15 eiei hynnin ka step phyrngab, ha kaba ka khyndew, ka la tap ia ki 4 tylli ki iing, kiba don ha katei ka jaka bad kumjuh ia ar tylli ki dukan bad ka surok bah kaba leit sha Sohra, ha kaba ka khyndew, ka la tap ia baroh ka surok bad kaba la shimpor haduh ka por 1baje nohsngi ban pynkhuid.
Sngewlem U Mukul ia kiba khlad
U myntri rangbah ka jylla u Dr.Mukul Sangma u la pynpaw ka jingsngewlem halor ka jingkhlad noh ki 4 ngut ha ki jingjia twa khyndew kiba la jia ha ka 17 tarik mynta u bnai ha ki ar tylli ki jaka kata ha Veneer Product Private Limited MIDC kaba don ha Tharia- Umiam, Ri Bhoi bad ha Lumkyntong Village kaba hap hapoh ka Sohra Civil Sub Division. U myntri rangbah u phah ka jingsngewlem sha ki longing kiba la ngat ha katei ka apot na ka daw ka jingshah lynshop ha ka bor mariang. U la phah ruh ban tohkit wut wut ia ki karkhana ban pyntikna ba ka rukom tei ia ki kan long kaba skhem haba wan ka jinglynshop na ka mariang.