Rong ka eriong, ia ka Sharak Rit ha Nongkynbah

Shillong, 18 Jymmang:
U myntri ka shnong Nongkynbah, U Bah K Thongni, u la phah khubor lyngba ka email ba ha ka miet jong ka 16 tarik Jymmang 2016, ba ka lyer bajur ka la rat ia ka iing-skul jong ka Sharak Rit Secondary School, Nongkynbah ha kaba ia u tnum jong kawei ka iing, la rat ploiñ bad pynhap lyndang ha madan. Ha kane ka jingjia, ka mala kaba lai ka la lko pom bad baroh ki kamra ki la pra lut kynthup ia ka kamra Computer. Hynrei don bok ba ka iing, ka ba ar bad kaba kham heh ka lait na ka jingshah pynjot. U Myntri u la ong ba kane ka la wanrah ka jingeh ia ki bor pyniaid skul ban maramot kloi ia ka skul namar ka jingjulor ka la jur bha bad khamtam ba ka aiom slap ruh ka la hajan. Ym tang ka skul hynrei ki don kumba 5 tylli kiwei pat ki iingbriew kiba la shah ktah ha kane ka jingwan jong ka eriong ha katei ka miet.
Ha kawei pat ka khubor, na ka liang jong U bah G G Bung Snaitang uba long u Secretary UDP Ranikor bad State Secretary jong ka UDP Central Body u la pynpaw ka jingsngewlem ia baroh kito ki longiing kiba la shah ktah ha ka Eriong. U la iathuh ba ha ka 16 tarik ki nongialam jong ka UDP Ranikor kynthup ia u bah P.K.Raswai, Pius Marwein, Bahdeng Wahlang, Golstar D. Shira bad kiwei kiwei ki la hiar sha ki shnong ki shnong khappud jong ka Ranikor Constituency ban leit ai jingiarap bad ki dang shim jingkhein ruh ban leit ai jingiarap sa ia ki shnong kiba hap ha Upland Area. U bah Snaitang u la phah ia kane ka khubor jong ka jongsngewlem sha baroh kito ki longiing bad u ong “Ba ka UDP ka ia don ryngkat ban ia sngewsih  lem bad phi ha kane ka jingshah pynjot jong ki bor ka mariang.”