Rong ka eriong 19 tylli ki ing ha Nonglum, julor T.16 lak Mynsaw jur 2 ngut , kyllon 8 tylli ki nar ilektrik

Shillong,8 Jymmang:
Ka eriong kaba jur ka la lynshop haduh 19 tylli ki longing ha ka shnong Nonglum, ka shnong kaba hap hapoh ka Umroi Konstitwensi. Na kitei ki 16 ing, 8 tylli ki dei kiba la julor bad haba ia kren bad u Rupang u Rangbah shnong ka Nong lum u bah M.Maw long u la iathuh ba ka jingjulor ha katei ka jingjia ka la kot sha ka T.16 lak tyngka. U la pyntip ba katei ka jingjia ka la jia ha ka por 12 baje mynsngi.
U Rangbah shnong u la iathuh ruh ba ha katei ka jingjia ki la don 2 ngut kiba mynsaw , ka mei ieid bad ka ksiew. Ka mei ieid ka dei kaba la tip kyrteng kum ka kong Jhod Wahlang, bad ka ksiew pat ka kong Balarisha Wahlang, 24 snem karta, ia kitei baroh 2 ngut la pynkit sha NEIGRIHMS Hospital.
Haba la kylli na u Rangbah Shnong , hangno kitei ki longing kiba la shah pynjulor ki ing ki shong ki sah, u la ong ba mynta la pynbeit ba kin shong kin sah ha ing ki para marjan, u la ong ba ki jingthung jingtep kim da shah ktah hynrei ka la don tang ka jingdkut ki sainar ilektrik, bad ki la don haduh 7-8 tylli ki Post ilektrik kiba la kyllon sha madan.
Na ka liangh u bah Mawlong u la ong ba u la pyntip ia katei ka jingjia mar-mar sha u MLA ka thain u ma Ngaitlang Dhar lyngba ka phone, ha kaba ma u –u la kular ban iarap ia ki lanot. ha ka por ba dang ia kren bad u nongthohkhubor hadien ba la jia katei ka jingjia u bah Mawlong u la ong ba un sa pyntip sha u MDC ruh u bah Albinus Lyngdoh.
Haba iakren bad U bah Albinus, u iathuh, ba ki don ruh 16tylli ki iing,kiba la shah rong ha ka eriong ha Mynri Lummadan, kaba hap ha Umroi Constituency hi mynta ka sngi.