Nongstoiñ: Ka kynhun ialehkai jong ka Laban SC ka la ioh ban rung sha ka Semi Final jong ka lympung Rani Motor’s Knock out Football Tournamement (RMKOFT) bala pyniaid da ka Laitkseh Sport Club (LSC).
Ka jinglah jong ka Laban ban poi shaduh katei ka thong kadei hadien ba kala lah ban pynliem noh ia ka kynhun ialehkai jong ka Boca Junior da 3 kol la 1 kol ha ka jingiakhun ia ka Quarter Final kaba khatduh jong katei ka lympung kaba la long hynnin ka sngi ha ka madan Mawkynjoin Laitkseh.
Haba phai sha katei ka jingiakhun Quarter Final kaba khatduh kaba long hapdeng kitei ki ar tylli ki kynhun kala long shisha ka jingialehkai kaba itynnad haduh katta katta namar ba ha ka sdang jong ka kylla step ka Boca Junior kala ioh ban lam khmat da 1 kol bad ia katei ka kol la ioh ban thep da u Rajib Marak ha ka minit kaba 11 bad na ka liang jong ka Laban kam shymla lah ban pynphai tad haduh ban da kut noh ka kylla step.
Shuh shuh haba bteng pat ia ka jingiakhun sa ha ka kylla miet na ka liang jong ka Laban kala iakhun dohiap ban ioh pyniakhaid hynrei kam shymla ioh lad satia watla kala ioh ia shibun tylli ki kabu, hynrei katba ka jingialehkai ka dang iaid kyndit kynsan kynsan ka Laban kala ioh ban pynphai ia katei ka 1 kol ia kaba la ioh ban thep da u Hauni Dkhar ha ka minit kaba 78 bad lyngba katei ka kol kala pynitynnad shuh shuh ia ki paidbah nong peitkai.
Kumta hadien katei ka jingiakhaid da mar shi kol na ka liang jong baroh ar kynhun kila iakhun tyngeh ban ioh ia u nam tam bad na ka liang jong ka Boca Junior kala ioh biang ia shibun tylli ki kabu hynrei kitei ki kabu kila shu sepei noh namar ka jingbym lah ban thep kol bad katei ka jingbym lah ban thep kol biang jong ka Boca Junior kala pynlong pynban ia ka Laban ban ioh thep biang sa ar tylli ki kol bad khur syndon ia ka jingjop.
Ia kitei ki ar tylli ki kol kiba hadien I kong ka Laban la ioh ban thep ha ka minit kaba 85 bad 90+4 ia kaba la ioh ban thep da u Eijingmut Lyngdoh bad u Vickyson Kharkongor bad ha katei ka sngi ia ka nam man of the match la ioh ban khur da u Joy Kharraswai jong ka Laban SC.