Nongstoiñ: Ka kynhun ialehkai jong ka Ryntih SC ka la ioh ban khur ia ka jingjop ha ka jingiakhun ia ka Quarter Final kaba nyngkong jong ka lympung Rani Motor’s Knock out Football Tournamement (RMKOFT) bala pyniaid da ka Laitkseh Sport Club (LSC) bad lyngba katei ka jingjop ka Ryntih kala ioh ruh ban rung syndon shaduh ka Semi Final jong katei ka lympung.
Ka jinglah jong ka Ryntih ban khur ia katei ka jingjop kala wan hadien ba kala lah ban pynliem noh ia ka kynhun ialehkai jong ka Nongkrem SC da 4 kol la 3 kol lyngba ka jingiashut tie breaker kata hadien ba kitei ar tylli ki kynhun kim shymla lah ban ia thep kol wat hadien ba ka jingiakhun kala poi shaduh extra time.
Haba phai sha katei ka jingiakhun Quarter Final hapdeng kitei ki ar tylli ki kynhun kala long shisha ka jingialehkai kaba itynnad haduh katta kata namar ka jingiabiang bor bha bad tad haduh ban da kut noh ka jingiakhun ha ka kylla step kitei ki ar kynhun kim shym patla lah satia ban ia pynkhih jar watla kila ia ioh mar katto katne tylli ki kabu.
Shuh shuh haba bteng biang ia ka jingiakhun ha ka kylla miet la sakhi ruh ba baroh ar kynhun kila iakhun tyngeh ban pynioh pynkhih jar bad ruh ban pynioh lam khmat ia la ka kynhun pynban kitei ki jingpyrshah jong baroh ar kynhun kim shym la ur long satia namar haduh ba kut noh ki 90 minit ruh ym shym don satia ba ioh pynkhih jar kumta na ka liang jong ki nongpyniaid kila rai ban phah iakhun biang sa mar 10 minit shiliang shiliang ha ka extra time.
Ha katei ka extra time kaba mar 10 minit ka jingiakhun kala pynsyier mynsiem ia ki nongkyrshan jong baroh tylli ki kynhun bad kumjuh ia ki paidbah nongwan peit kai namar lyngba katei kapor ki paidbah kila ap khmih lynti ba ka kynhun ka ban ioh pynkhih jar kan long ruh ka kynhun ka ban ioh khur jingjop hynrei ha katei ka jingiakhun ruh kitei ki ar kynhun kim shymla ioh satia ban pynkhih jar watla kila ia ioh ia ki kabu thepkol bad ha kaba kut ki nongpyniaid kila rai ban phah shut noh da ka tie breaker ban pt dkut noh ia katei ka jingiakhaid.
Kumta lyngba katei ka tiebreaker la lah ban iohi ia ka kynhun kaba khur ia ka jingjop kata ka Ryntih SC kaba la pynliem noh ia ka Nongkrem da 4 kol la 3 kol bad ia ka nam Man of the Match ha katei ka sngi la ioh ban khur da u Wanlamsuk Nongkhlaw jong ka Ryntih SC.