Nongstoiñ: Ka kynhun ialehkai jong ka Assam Regimental Centre FT (ARC) kala lah ban jam sa sha ka Quarter Final ha ka lympung Rani Motor’s Knock out Football Tournamement (RMKOFT) bala pyniaid da ka Laitkseh Sport Club (LSC).
Ka jinglah jong ka ARC ban jam sa sha katei ka wat kadei hadien ba kala ioh ban pynliem noh ia ka kynhun ialehkai jong ka Hynniewtrep FC da 4 kol la 0 ha ka jingiakhun ia ka wat kaba ar jong katei ka lympung kaba la long ha ka sngi Saitjain jong ka taiew bala lah ha ka madan Mawkynjoin Laitkseh.
Haba phai sha katei ka jingiakhun kaba la long ha pdeng kitei ki ar tylli ki kynhun watla ka jingioh thep kol kala long kaba kham noh shiliang hynrei ym lah ruh ban len ba ka jingialehkai kala long kaba itynnad bha namar ka jinglah ban pyni ia ka mynsiem iakhun da baroh ar tylli ki kynhun.
Ka jingiakhun ha ka kylla step na ka liang jong ka ARC kala ioh ban lam khmat lypa da 2 tylli ki kol bad ia kitei ki kol la ioh ban thep da u Francis ha ka minit kaba 19, u N. Rakesh ha ka minit kaba 37 bad na ka liang jong ka Hynniewtrep FC ruh hadien ba kala shah thep Kam shymla rit mynsiem hynrei kila ialeh doh iap ban iakhun khnang ban ioh pynphai ia kitei ki kol bala shah thep hynrei haduh ba kut ka kylla step Kam shymla ioh lad satia.
Shuh shuh haba bteng pat ia ka jingiakhun sa ha ka kylla miet na ka liang jong ka Hynniewtrep FC kala iakhun tyngeh bad kala ioh ruh ia ki katto katne tylli ki kabu hynrei da ka jingbym lah ban ia tur pyrshah ia ki rangialehkai ka ARC kitei ki kabu kila shu sepei lut noh bad na ka liang jong ka ARC kala ioh biang ban thep sa ar tylli ki kol ha katei ka kylla ia kaba la ioh ban thep da u L. Robert ha ka minit kaba 59 bad u N Rakesh ha ka minit kaba 75.
Ha katei ka sngi ia ka nam rangialehkai ba kynsai tam la ioh ban khur da u N. Rakesh u ba dei u kapten ka ARC u bala ioh ban pyni ia ka sap lyngba ka jinglah ka kong u ban ialehkai bha ha katei ka sngi bad na ka liang jong ka LSC kala pyntip ba ka jingiakhun ka ban bud jong katei ka wat kan long biang sa ha ka 14 tarik mynta u bnai ha kaba ka Marbisu FC kan iakhun pyrshah ia ka Nongkrem FC.