Nongstoiñ: Ka kynhun ialehkai jong ka Nongrim Hills SSCC, kala lah ban jam sa sha kawei pat ka wat kata ka wat kaba ar lane ka Pre Quarter Final jong ka lympung Rani Motor’s Knock out Football Tournament 2018, ba la pyniaid da ka Laitkseh Sport Club.
Ka jinglah jong ka Nongrim Hills ban poi shaduh katei ka wat kadei hadien ba kala lah ban khur ia ka jingjop hadien ba ka la lah ban pynliem noh ia ka kynhun ialehkai jong ka Board President XI (Malki) da 5 kol la 0 ha ka jingiakhun kaba la long ha ka sngi ba ar jong ka taiew ha ka madan Mawkynjoin Laitkseh.
Haba phai sha katei ka jingiakhun kaba la long ha pdeng kitei ki ar kynhun kala long shisha ka jingialehkai kaba itynnad bha namar ka jinglah jong ka Nongrim Hills ban ialehkai bha kaba la pynshoh biej ruh ia ki paidbah nongwan peitkai watla haba phai sha ka jingioh ban thep kol kala long kaba kham noh shiliang.
Na ka liang jong ka Nongrim Hills kala ioh ban lam khmat lypa da 3 tylli ki kol tang ha ka jingiakhun jong ka kylla step bad ia kitei ki 3 tylli ki kol la ioh ban thep da u Nickelson Bina ha ka minit kaba 18, u Bishar Mawthoh ha ka minit kaba 30 bad u Jeffry Surong ha ka minit kaba 33.
Shuh shuh haba wan phai biang ha ka jingiakhun sa ha ka kylla miet na ka liang jong ka Board President XI kala ialeh tyngeh ban rah ia ka bol shakhmat na ka bynta ban ioh thep kol ha kaba kala ioh ruh ia shi bun tylli ki kabu ban thep kol phewse kitei ki kabu baroh ki shu sepei lut noh namar ka jingbymlah jong ki rang ialehkai khmta ban thep kol.
Ym tang kata katba ka jingiakhun ka dang iaid na ka liang jong ka Nongrim Hills kala ioh ban khyrwit biang sa 2 tylli ki kol ha katei ka kylla miet bad ia kitei ki ar tylli ki kol la ioh ban thep biang da u Bishar Mawthoh ha ka minit kaba 52 bad u Jeffry Surong ha ka minit kaba 75 katba na ka liang jong ka Board President XI kam shymla ioh lad ban pynphai wat tang 1 kol ruh tad haduh ba ka jingiakhun kan poi noh sha kaba kut.
Ha katei ka sngi ia ka khusnam Man of the Match la ioh ban khur da u Jeffry Surong jong ka Nongrim Hills bad na ka liang jong ka Nongrim Hills kan hap ban iakhun pyrshah sa ia ka kynhun ialehkai jong ka Sawmer SC ha ka wat ka baa r jong katei ka lympung.