Nongstoiñ: Ka kynhun ialehkai jong ka Nongrim Hills SCC kala lah ban pynliem noh ia ka kynhun ialehkai ba khlain bor jong ka Assam Regimental Centre FT ha ka jingiakhun ia ka Quarter Final kaba ar jong ka lympung Rani Motor’s Knock out Football Tournamement (RMKOFT) kaba la long ha ka sngi Saitjain jong ka taiew bala lah ha ka madan Mawkynjoin Laitkseh.
Da katei ka jingjop ka Nongrim Hills kala ioh ban rung syndon shaduh ka Semi Final jong katei ka lympung bala pyniaid da ka Laitkseh Sport Club (LSC) bad ka ban sa iakhun pyrshah ruh sa ia ka kynhun ialehkai jong ka Ryntih SC kaba long kawei na ki kynhun ba khlain bor bha kaba la ap lypa ha katei ka semi final ka ban sa long ha u snem thymmai 2019.
Haba phai sha katei ka jingiakhun Quarter Final kaba la long hapdeng ka Nongrim Hills pyrshah ia ka ARC kala long shisha ka jingialehkai kaba itynnad haduh katta katta bad kaba la pynlyngngoh ruh ia kiba bun ki nongwan peitkai namar kim shym la khmih lynti satia ba ka kynhun ialehkai jong ka ARC kan shah pynliem noh ha ka Nongrim Hills namar ka long kawei na ki kynhun kaba khlain bor bha.
Ka jingiakhun ha ka kylla step kala long kaba jwat bha ia baroh ar tylli ki kynhun ban ioh pynkhih jar watla kila ia ioh mar katto katne tylli ki kabu thep kol bad ka jingiakhun ha katei ka kylla kala lut noh hapdeng ka jingiakhaid namar ka jingbym ialah ban pynkhih jar bad haba bteng biang ia ka jingiakhun ha ka kylla miet ka Nongrim Hills kala ioh ia kawei ka kabu ksiar ban ioh thep kol ha ka minit kaba 49 bad khlem da pynsepei u Pura Nongbri u la ioh ban khyrwit ia ka 1 kol iala ka kynhun.
Hadien katei ka jingshah thep kol ka jingiakhun kala nang kham itynnad shuh shuh namar ba baroh ar tylli ki kynhun kila iakhun tyngeh bad kumjuh na ka liang jong ka ARC ruh kala wad ia ki buit ki lynti ban ioh pynphai noh ia katei ka 1 kol hynrei ka bok kam shymla don satia bad ka ARC bad haduh ba kut noh ki 90 minit Kam shymla ioh satia ban pyniakhaid ia katei ka kol bad hap ban mad syndon ia ka nam rem.
Ha katei ka sngi ia ka nam Man of the Match la ioh ban khur da u Nickleson Bina jong ka Nongrim Hills, bad na ka liang jong ka LSC ka pyntip ba ki jingialehkai Quarter Final ki ban bud kin long sa ha ka 9 tarik u bnai ba nyngkong jong u snem 2019 ha kaba ka Mylliem SC kan iakhun pyrshah ia ka 7 Wasa FC bad ha ka 12 tarik bnai ba nyngkong 2019 ka Boca Juniors FC kan iakhun pyrshah ia ka Laban SC.