Nongstoiñ: Ka kynhun ialehkai jong ka Kith United FC kala lah ban khur ia ka jingjop ha ka jingiakhun kaba 10 jong ka lympung Rani Motor’s Knock out Football Tournamement (RMKOFT) bala pyniaid da ka Laitkseh Sport Club (LSC).
U Lambor Nongsiej jong ka Kith United u bala ioh ban khur ia ka nam MOM.
Ka jinglah jong ka Kith United FC ban khur ia katei ka jingjop kala wan hadien ba kala lah ban pynliem kput noh ia ka kynhun ialehkai jong ka Thingni FC da 8 kol la 2 kol ha ka jingialehkai kaba la long ha ka sngi Saitjain jong ka taiew bala lah ha ka madan Mawkynjoin Laitkseh.
Haba phai sha katei ka jingiakhun kaba la long hapdeng kitei ki ar tylli ki kynhun kala long kaba kham noh shiliang namar ka jingbym lah ban ialehkai bha da ki rangialehkai ka Thongni FC namar ka jingbtuit palat ka madan namar ka jingjur jong u slap kaba la pynlong ruh ia ka Kith United ban pyndonkam pura ia katei ka kabu ha kaba kala lah ban thep haduh 4 kol tang ha ka kylla step.
Watla ka Thongni FC kala shah nion ha ka jingialehkai pynban kala lah ban pyneh ia lade da kaba kala ioh ban thep ia ka 2 tylli ki kol hynrei katba ka jingiakhun jong ka kylla miet ka dang iaid na ka liang jong ka Kith United kala ioh biang ban thep sa 4 tylli ki kol kaba la pynlong ruh ia katei ka kynhun ban jop kput ia ka jingialehkai.
Ia kitei ki 8 kol jong ka Kith United 4 tylli na ki la ioh ban thep da Lambor Nongsiej ha ka minit kaba 9, 24, 38 bad 85 minit, katba 2 tylli la ioh ban thep da u Pynbha Marngar ha ka minit kaba 72 bad 79 minit, katba u Rapborlang Marwein bad u Skhembor Hahshah kila ioh mar 1 kol katba ia ki ar tylli ki kol eh daw jong ka Thongni FC kala ioh ban thep da u Hopefulness Thongni ha ka minit kaba 39 bad u Sylvester Thongni ha ka minit kaba 82.
Ia ka nam man of the Match ha katei ka sngi la ioh ban khur da u Lambor Nongsiej jong ka Kith United u bala ioh ban thep haduh 4 kol marwei bad ia katei ka khusnam la sam da u Sordar ka shnong Laitkseh u bah H. Thongni bad na ka liang jong ka LSC kala pynbna ba ka jingiakhun ka ban bud Kan long biang ha ka 20 tarik mynta u bnai hapdeng ka Board President XI pyrshah ia ka Nongrim Hills FC.