Risain U MLA Congress, ban pyn iasoh sha ka BJP

U MLA jong ka Mariani, U Rup Jyoti Kurmi, hynnin ka sngi, ula hiar shuki noh kum U MLA jong ka seng Congress, na ka bynta ba un pyn iasoh ialade sha ka seng BJP.

U Rup Jyoti Kurmi, hynnin ka sngi, ula phah ia ka shithi iehnoh kam sha u lamphang dorbar, U Biswajit Daimary.

U Kurmi, un pyn iasoh ialade sha ka seng BJP, ha ka 21tarik Jylliew 2021, ha ka jing ialang, ka ban long ha Lakhimpur.

U Kurmi, u kynnoh ba ki nongialam ba ha khlieh jong ka seng Congress, kim donkam shuh ban trei bad u iathuh ba ka don ruh ka jingleh thombor, ha ka rukom trei kam jong ki nongialam ka seng Congress ha ka Jylla bad ula ong shuh shuh “Ka Congress, ka long kum u dieng bah, ha kaba ki sla jongka, ki la nang hap bad iap stai”. U da iaroh ruh ia ka jingtrei kam U Himanta Biswa Sarma, myntri rangbah ka Assam bad na kata, ka daw, ba u sngew kwah ban pyn iasoh ialade sha ka seng BJP.