Risaiñ u heh HSPDP ba sospon MDC

Shillong, 10’lyngkot:
Namar ka jingshah sospon u MDC ka Sohryngkham u bah Pyniaid Sing Syiem 2 snem ha ka seng HSPDP halor ki jingshah kynnoh ba u leh pyrshah ia ka Party, mynta ka sngi uwei na ki nongialam rangbah katei ka seng uba bat ia ka kam Publicity Secretary u Dr.Paul L Dkhar u la risaiñ noh na katei ka seng.
Ha ka shithi risaiñ ba u la phah sha u President katei ka seng u bah Ardent M Basaiawmoit u Dr.Paul u la ong ba ka daw ka dei namar ka jingbym sngewtynnad ban iohi ia kiei kiei kiba jia ha ka party halor ka jingshah sospon kaba khlem nongrim ia u bah Pyniaid khlem kino kino ki daw kiba biang. “Naduh mynta ka sngi ka 10 tarik u kylalyngkot, ngan risaiñ noh kum u Publicity Secretary East Khasi Hills jong ka Party namar ka jingshah sospon u bah Pyniaid” ong u Dr.Paul ha ka shithi risaiñ.