Risaiñ kam Parliamentary U MLA ka Siju, ban ialeh MP

Shillong, 26 Iaiong:
Sa ar ngut ki kyrtong ki la mih mynta ha ka elekshon MP shiteng samoi na Tura Konsti twensi nalor u Conrad Sangma ka NPP bad ka Dikanchi D Shira ka Congress. Kitei ki ar ngut ki kyrtong ki long u Panseng B Marak uba ju khot u Panpan uba pyntip sha ki lad khubor ba un thep kyrteng kum u kyrtong ha ka 29 tarik mynta u bnai bad sa uwei pat u dei u MLA ka Siju-Rongara uba dei ruh u Parliamentary Secretary ka sorkar jylla u Rophul S Marak uba peit ia ka tnad C&RD Block. U Rophul u la risaiñ noh na ka kam Parliamentary Secretary mynta ka sngi bad ia ka shithi risaiñ u la aiti sha u myntri Rangbah ka jylla u Dr.Mukul Sangma.
Haba ia kren bad ki lad khubor u Rophul u la ong “Nga la thep ia ka shithi risaiñ sha u myntri rangbah ba nga risain na ka kam Parliamentary Secretary bad ngan ia khun ha ka elekshon MP shiteng samoi ,nga long uba la khreh ban ia khun pyrshah ia u Conrad bad kumjuh ruh ia ka Dikanchi , nga don jingkyrmen ban jop”. U Rophul, u la pynpaw ruh ba um sngewtynnad ban donlang hapoh ka sorkar Congress bad kane ka jingmih jong u shakhmat ban ia khun elekshon u la ong ba dei na ka daw ba u kwah ban shim ka jingkitkhlieh na bynta ka ri Lum Garo.