Risain ka nongsam khaw reshon ha Lumlyer

Shillong, 15 Jymmang:
Ka nongsam khaw reshon ka shnong Kynroh Lymlyer ‘A’ centre kaba don ha Sohiong ka East Khasi Hills, ka la risain noh na ka kam nongsam khaw reshon da kaba ai daw, ba kam ioh nong ban long nongsam khaw.
Katkum ka shithi ba la ioh kopi, ka Kong Marylinda Dkhar kaba dei ka nongsam khaw reshon ha kane ka shnong, ka la phah shithi sha u sordar ka shnong ba kam lah ban bteng ia ka kam kum ka nongsam khaw reshon namar ba kam ioh nong.
“Nga la iehnoh ia ka kam nongsam khaw namar ba ngam sngew lah ban shim ia kane ka kam khlem ka bainong”, la ong ka shithi ka Kong Marylinda ba la phah sha u sordar ka shnong
Hynrei kaba sngew phylla ka long ba u sordar u Bah Binus Kharthangmaw bad u Secretary Bah Charles Kurbah ki la phah ia ka shithi risain noh sha ki rangbah ka shnong na ki kam ba ki bat.
Katkum ka jingtip, la iathuh ba u secretary shnong u dei u lok jong ka kong Marylinda kaba dei ka nongsam khaw reshon ha katei ka shnong.
La iathuh ba ka jingrisain jongki, ka dei tang namar ba ki nongbam khaw reshon katei ka shnong katto katne kim shah ban ot tam ia ka dor na ka dor ba la buh da ka sorkar bad ym shah ban pynduna jingthew ia u khaw kumba la bhah ia ki.
Ka President ka CSWO ka Kong Agnes Kharshiing ka la ong ba kine ki jingpynkiew dor ki long beaiñ namar ba ka dor ba la buh da ka sorkar ym lah ban pynkiew namar ba ka ktah ia u duk u suk.
Kane ka jingjia kam dei tang ha kane ka shnong, hynrei bun kiwei ki shnong kim nud ban ujor ba shah pyntieng da kumne kumtai kum ban shah tait shnong bad kiwei jong ki kam ba ju leh ki nongsynshar shnong. Ka ban ruh ba lada don kino kino kiba kwah ban mudui ki dei ban mih shakhmat bad ban nym tieng ban ioh ia la ka hok lajong.
Ka la pyntip ba ia u khaw dei ban sam baroh shi bnai ym ban buh da ki sngi namar ba teng teng kiba duk kim don pisa ban sei mar mar.
La iathuh ba ha ka jingshisha kine ki lai ngut ki la iakynduh ia u Deputy Commissioner ba ki la rai ban nym sei khaw ia kito ki nongbam khaw bym shah ban pynkiew dor hynrei na ka liang u Deputy Commission um shym la shah ia ki ban leh kumta.