“Riewspah tam ki nongrep Meghalaya ban ïa ki nongrep ka Punjab”

Shillong: Ym dei satia kito ki nongrep jong ka jylla Punjab, hynrei dei ki nongrep jong ka thaiñ shateilammihngi jong ka jylla Meghalaya ka Ri India, kiba mynta ki long kiba riewspah tam hapoh ka Ri India baroh kawei.

Katei ka la paw katkum ka kaiphod jong ka jingleh jurip kaba dangshen kaba la pynlait kaba la ai kyrteng da ka ‘Situation Assessment of Agricultural Households and Land and Holdings of Households in Rural India, 2019’.

Katkum katei ka kaiphod, ha u snem 2018-19, ka jingkheiñ pynhab dor ryntih ki longïing kiba wan na ki kam rep ha Meghalaya ki kamai kumba T. 29,348 ha ka shi bnai, katba ki longïing kiba wan na ki kam rep ha jylla Punjab ki kamai kumba T. 26,701 ha ka shi bnai.
Ha kawei pat ka liang, ka jylla Jharkhand, Odisha, West Bengal, Bihar, bad jylla Uttar Pradesh ki la shah buh ha ka jingthoh ba ki dei ki nongrep kiba duna bha ka jingïoh kamai.

Ha ka jingshisha, ka jinglum jingkheiñ kyllumlang ïa ka jingïoh ba la kamai da ki nongrep jong ki saw tylli ki jylla kum ka Jharkhand, Odisha, West Bengal, bad Bihar ki la long kiba ïoh kamai barit duh ban ïa ka jingïoh kamai ki nongrep ka jylla Meghalaya lane jong ki nongrep ka jylla Punjab.
La ong ba namar ba ka India kam shym la don satia ka jingkheiñ kyllumlang da ka tnat sorkar jong ka jingbun ki nongshong shnong kiba im ha ka rep ka riang hapoh ka Ri, kumta kam shym la don satia ruh ka jingkheiñ kaba shisien shi snem ïa ka jingthew pynïaryngkat jong ka jingïoh kaba la kamai da ki nongrep.

Katei ka jingïoh jingkheiñ dei ka kaiphod ba la lum kyllumlang da ka National Statistical Office (NSO) lyngba ka jingjurip ïa ki nongrep kaba ka la lah barabor manla ki 10 snem.
Kumba long ïa kaba mynta, ka jinglum jingkheiñ ïa ka jingïoh kamai ki nongrep ba la ïoh na ka NSO ka la don ha ki lai snem, kata jong u snem 2002-03, 2012-13 bad kaba dang pynmih dangshen kadei jong u snem 2018-19.