Rem ka UDP ha Umroi ba shet kylla ka HSPDD, ong ka UDP

Shillong, 15 Nailur:
Ka UDP Youth Wing ka la takrain kylla ia ka HSPDP kaba la kren dait bad kynthah ia u Working President jongka u bah Paul Lyngdoh. Ha ka kyrwoh ba la pynlait, u Joint Secretary ka UDP Youth Wing u Bah J Khymdeit u la ong ba ka jingkren dait ka UDP ia u Bah Lyngdoh da kaba niew tang ia ki por mynshwa ka la dei ban pynkynmaw ruh ba ka jingsdang khyllem ka MPA ha ka por ba synshar ka dei namar ba shet kylla ka HSPDP kaba pynieng kyrtong na elekshon shiteng samoi na Umroi ha ka por ba khlad noh u Bah EK Mawlong.
“Kane ka jingshet kylla ka HSPDP ban pynieng kyrtong, ka la pynioh lad ia ka Congress ban jop ha katei ka elekshon”, la kynthah sa ka UDP Youth Wing.
Ka la ong ba ka jingkren jong u Bah Pyniaid Sing Syiem ia u Bah Paul Lyngdoh kam iahap eiei namar ba ka UDP ka sngewthuh khambha ia kaei kaba la pdiang ia u bah Paul Lyngdoh.“Ka jingkren kynthah jong u Bah Pyniaid ka dei tang ka jngthmu ban pynsniew dur ia u nongialam bad ka party kam pdiang da lei lei ruh”, la ong u Bah J. Khymdeit.