Rem ka NPP na Garo Hills ba saphriang ka khubor thok ban shna pisa, da ka dur blei thaw bad mandir

Shillong:Halor ka jingshah rem ka kyrtong ka NPP na Agatha K Sangma ha u kyrtong ka Congress u Saleng A Sangma, u Rakkam A Sangma u la ong ba ka jingshah rem ka NPP ha Garo Hills, ka dei na kawei ka video kaba la shu shna ban pynbud nam da ka dur Durga bad ka Mandir.

Haba kren mynta ka sngi, u la ong ba la ialam bakla ia ki paidbah ba ia ka pisa yn shna ha kane ka dur ka mandir bad ka blei durga ki Hindu, bad kila pynphriang ia kane ka video kaba la shu shna lamler bad kila pynngeit ia ki Khristan, hato kin pdiang ia kaba kum kane, ha kaba ka NPP bad ka BJP kin shna ia kaba kum kane ka dur pisa, bad hato ki Khristan kin dang ai bai kynshew ha ki iingmane da kane ka pisa.
Kane ka la pyllong ia ki paidbah ban shah ialam bakla. U la ong ba teng teng ka politik ka la tam palat ia u pud ruh.

Ha kajuh ka por, u la ong ba lehse ki paidbah ka Garo Hills ki kwah ia u MP ba thymmai.
Haba kyntait ban don kano kano ka jingeh ia ka NPP ha ki sngi ban wan, u Rakkam u la ong ba ka jingshah rem, kan pynlong ia ka party ban trei kham tyngeh.
U nongialam ka NPP u la ong ba ha kane ka elekshon ki kynhun Balang ki la shah pynsngewthuh bakla ha ki khubor kum ki video ki bym shisha, kaba la pyllong langknia ia ka NPP.

Katkum ka jingong u Rakkam, ki kynhun Balang ki la long ka daw kaba pynlong ban ai ia ka rai ha ka elekshon khamtam hadien ba ka BJP kam shym la sei kyrtong ban iakhun MP, ban shu kyrshan ia ka NPP, ki kynhun Balang ki la shah pynsngewthuh bakla ia kiei kiei ki bym shisha.

U la ong ba kum ka party, ka NPP kan sa shong jingialang ban iathir ia kane ka jingshah rem. Ha kajuh ka por, u la pynpaw ia ka jingsngew kyrmen hadien ba ka synjuk National Democratic Alliance (NDA) kaba ialam ka BJP ka la wan biang ha ka bor ha ka sorkar pdeng.
Lah ban kdew ba ki kyrtong ka NPP na Tura bad na Shillong kila shah kput ha kane ka elekshon MP sha ka Lok Sabha, kaba la pynbna ha ka 4 tarik Jylliew 2024.