Shillong:Da kaba liem biang hynnin ka sngi ha ka Haryana da san wicket, ka Meghalaya ka la rem san sien san wat ha ka lympung jong ka Syed Mushtaq Ali Trophy 2023 T20 tournament ba la ialeh ha Jaipur
Hadien ba la duh ia ka toss, ka Meghalaya ka la hap ban tied shuwa bad kamai tang 94 ha ki 19.1 over ia kaba ka Haryana ka la lah ban tam ia katei ka thong tang hapoh 16.3 over da kaba kamai 96 bad liem tang san ngut ki wicket.
Uba la tied bun na ka Meghalaya u dei u Nahul Verma da kaba kamai 43 na ki 34 bol kaba kynthup ia san tyli ki 4. Nalor jong u u Riboklang Hynniewta u tied 19 na ki 28 bol kaba long ka jingtied kaba bun eh jong u ha kane ka tournament.
Ha ka kylla miet jong ka jinglehkai, la iohi ba ki nongkawang bol ka Meghalaya kim shym la shah jem da kaba suk, hynrei namar ka jingduna eh ka jingkamai run jong kane ka kynhun, ki nongkawang bol kim shym la lah satia ban iada na ka jingai jubab jong ka liang pyrshah. U Rajesh Bishnoi u bym shym la lah ban tied bha ha ka kylla step, u la lah ban shim ar ngut ki wicket da 13 run ha ki 4 over. Nalor jong u u Chengkam Sangma u ioh 1/17 ha ki 2 over bad u Akash Kumar Choudhary 1/18 ha ki 3 over
Ka jingiakhun kaba sah bad kaba khatduh jong ka Meghalaya ha kane ka lympung kan long lashai ka sngi pyrshah ia ka Baroda.
Ha kawei pat ka jingialeh kaba nyngkong jong ka Meghalaya ha ka lympung jong ka Senior Women’s T20 Trophy pyrshah ia ka Bengal, ka kynhun ka jylla ka la rem noh da phra wicket. Da kaba tied shuwa hadien ba la duh ia ka toss ka Meghalaya ka la pynlut lut ia ki 20 over hynrei ka la kamai tang 43/7 bad kaba la tied bun ka dei ka Rubi Chettri 12 run bad dang iaineh, bud sa ka Luiza Tamang 12 run.
Ha ka jingkawang bol ka Rebeldalis Syiemlieh ka ioh 1/8 ha ki 1.5 over bad ka Ajima Sangma ka ioh 1/8 ha ki 2 over kiba dei ki nongkawang bol kiba lah ban shim ia ki wicket ka Bengal kaba la lah ban kot sha ka thong tang ha ki 7.5 over. Mynta ka sngi katei ka kynhun ki thei ka jylla kan iakhun pyrshah ia ka Chandigarh.
Phi don ban ong eiei?