Shillong: Ka Imson ka la shah rem ha ka Nongrim Hills da 1-2 ha ka jingiakhun pynkut ka lympung ialehkai First Division ka SSA myn hynnin ka sngi ha madan Polo.
Ia ki ar kol na ka Nongrim Hills la thep da u Samborlang Sohtun ha ka 78 bad 80 minit jong ka kylla miet. Katba ka Imson ka la thep shikol lyngba u Oversharp Iawphniaw ha ka 42 minit jong ka kylla step.
Ka Nongrim Hills ka la khur pura lai point ban kiew ha ka kyrdan ba-ar da 19 point na ki 9 sien iakhun katba ka Imson ka la hiar sha ka kyrdan basaw da 18 point na ki 9 sien iakhun.
Ha kajuh ka por ka Nongrim ka la ioh ban kiew sha ka Shillong Premire League SSA ryngkat ka Laban ba bat ia ka kyrdna bayngkong da 20 point na ki 9 sien iakhun ba la dep.
Ha kawei pat ka jingialehkai 1st division hapdeng ka Rising bad ka Wahingdoh, ka Rising ka la pynbam jem da shiteng dorjon ia ka Wahingdoh da 6-0.
Kane ka nam jop ka leit sha u Batiphar Swer uba la thep saw kol ha ka 19 bad 24 minit lyngba ka penalty bad 53 &59 minit, katab u Yangming Khriam bad u Jerimon Shylla ki la thep ha ka 36 bad 43 minit.
Watla ka Rising ka la lah ban pynliem kput ia ka Wahingdoh ha ka jingiakhun bad jam sha ka kyrdan balai da 19 point ryngkat bad ka Nongrim Hills ha ka kyrdan ba-ar, hynrei ka la duh ban rung sha ka SPL, namar ka Nongrim Hills ka la jop ia ka da 3-1 ha ka jingiakhun ba la dep.
Ka Wahingdoh ka kynhun ba la paw bha ha ka jylla ha ki snem ba la dep, ka hiar kynsan jrain rain rain sha ka second division syndon ryngkat ka Smit ha ka samoi ialehkai ban wan.
Na ki shiphew tylli ki kynhun ialehkai, ka Wahingdoh ka neh ha trai duh da kaba kamai tang 3 point na ki 9 sien iakhun, kata hadien ba ka la iakhaid lai sien bad rem noh hynriew sien.
Katba ka Smit ka kynhun ba dang shu rung mynta ka samoi ka la kamai 6 point na ki hadien ba la jop shisien bad iakhaid lai sien na ki 9 sien iakhun.
Ha ka jingialehkai third division ka Mawpat bad ka Umphrup ki la hap ban iasam mar shipoint hadien ba ki la iakhaid khlem don mano mano ba ioh thep kol.