Shillong: Ka Imson ka la shah pynliem noh ha ka Nongkrem da 2-1 ha ka jingialehkai First Division ka SSA myn hynnin ka sngi Balang ha madan Polo.
Ia ka Nongkrem la thep da u Kerbok Nongspung ha ka 8 minit bad u Shanbok Nongsiej ha ka 85 minit katba ka Imson ka la pynphai shikol da Korbar Dkhar ha ka 56 minit.
Ha ka jingiakhun ka 2nd division, ka Laitkor lyngba ka hat trick u Samborwell Mynsong ka la pynliem ia ka Laitlyngkot da 3-2 kol ha ka second division. U Samborwell Mynsong ula thep ha ka 20,39 bad 81 minit, katba ia ka Laitlyngkot la thep ar kol lyngba u Bhakupar Rynjah ha ka 45 minit bad u Barsius Nongkynrih ha ka 82.
Da kane ka jingjop ka Laitkor ka la khur pura lai point katba ka Laitlyngkot ka la hap ban leit phai iing thylli.
Ha ka 3rd division, ka Sanmer ka la pynliem ia ka Lawmali da 4-0 ha kaba u Babit Dorphang na ka Sanmer ula thep ar kol ha ka 55 bad 65 minit, katba u Judicius Khonglah bad Wonderful Lyngkhoi ki la thep mar shikol ha ka 58 bad 69 minit.
Ha kawei ka jingia-lehkai, ka Lapalang ka la jop da shikol la nod ia ka Nongsohphoh. Kane ka kol ia ka Lapalang ka dei lyngba ka penalty ba la shut da u Mac Donald Kharkrang ha ka 22 minit.
Ka Mylliem ka la pynliem ia ka Lawmei da 2-1 kol, ha kaba u Donboklang Nongsteng ula thep ha ka 30 bad u Lamborsing S Nongdhar ha ka 50 minit katba ka Lawmei ka la thep kawei da u Mynteilang Shadap ha ka 52 minit.