Rem ka HSPDP ha Rambrai na ka dohsniang bad ka bai Khristmas ki myntri sorkar: Pangniang

Shillong,18 Nohprah:
Ka HSPDP kaba don ia u MLA jong ka ha Rambrai konstitwensi ka la shah pynrem kput ha ka elekshon MDc shiteng samoi ha u kyrtong ka seng Congress. Kham mynshuwa u MLA ka Rambrai u bah K.P Pangniang u la kob ba katei ka seng kan jop da kaba suk ha katei ka konstitwensi bad katei ka long kaba la thikna bha, u la ong hynrei haba la niew pat ia ki vote ka HSPDP ka la shah tam kput pynban.
“Ngi khlem poi pyrkhat ba tang hapoh 3 sngi kan kylla ka vote, ngim poi pyrkhat ba ki Garo kin shet ia ngi kiba la leh bha ia ki tang na ka daw ka jinghiar ki 4/5 ngut ki myntri sorkar ban pynbam dohsniang bad ban sam bai Kristmas” ong u bah Pangniang haba ia kren mynta ka miet lyngba ka phone bad u rupang.
U bah Pangniang u la ong ba wat ha ki jaka lum ruh ka HSPDP ka la hiar bha hynrei u shu tharai ba imat ki paidbah kim pat ibit ban jied ia u kyrtong ba katei ka seng ka la pynieng, “Imat ki paidbah kim pat ibit ia ngi” u la ong. Shuh shuh u bah Pangniang u la ong ba katei ka jingshah rem kan dei ka jingrem ka ban pynbha shuh shuh ia u, “Dei ka jingrem ka ban nang pynbha ia nga” u la ong.
Haba twad jingmut na utei u rangbah u la ong ba ka la shonghok ia u ban risain noh na ka kam nongialam ka HSPDP namar katei ka jingrem kput ha konstitwensi kaba u long MLA ma u. “Nga sngew shongnia ban risain noh na ka kam nongialam ruh namar katei ka jingshah rem” u la bynrap biang.
Katkum ki tyllong khubor kiba la iohlum na ki lad khubor la iathuh ba ka seng HSPDP kan sa shong jingialang shen ban pyrkhat na ka bynta ka jingrem elekshon jong ka khamtam ha Rambrai bad Nongkrem ban wad ia ki daw.