Rem 15 ngut ki MDC barim, 7 ngut kiba dang jop biang

Shillong:Kane ka elekshon MDC 2019 ka dei kaba kham phylla ha KHADC ha kaba bun ki MDC barim ki la liem lut mynta ka kynti, ki la don haduh 15 ngut ki MDC barim kiba la rem noh.
Kitei ki 15 ngut ki MDC barim kiba la shah rem noh ha kane ka elekshon ki long ka kong Teilinia Thangkhiew na Mylliem konstitwensi, u bah James Ban Basaiawmoit na Mawkhar-Pynthor, u bah L.G Nongsiej na Nongstoiñ, u bah Equator Nongrang na Mairang, bah Hadrian Lyngdoh na Mawkyrwat, u bah Jansing Tynsong na Lyngkyrdem-Laitkroh, u bah Neil Antonio War na Malki-Laitumkhrah, u bah Donkupar Sumer na Umsning, u bah James Sylliang na Mawhati, u bah Albinus Lyngdoh na Umroi, ka kong Rona Khymdeit na Nongpoh, u bah Donevan Kharwanlang na Sohra bad u bah Ricky Shullai na Laban-Mawprem.
Ki don pat 7 ngut ki MDC barim ki bym shym la ia khun shuh ha kane ka elekshon MDC bad kitei ki long u bah Manstudy Nongrem na Langrin, u bah Kimfa Marbaniang na Rambrai, u bah Samlin Malngiang na Sohiong-Nongspung, u bah Process T Sawkmie na Mawlai, u bah Banteidor Lyngdoh na Mawkynrew, u bah H.S Shylla na Nongkrem bad u bah Adelbert Nongrum na Jaiaw. Ha kane ka kynti ba mynta ki don ruh 7 ngut ki MDC barim kiba dang wan phai biang bad kitei ki long ka kong Grace Mary Kharpuri na Nongshken, u bah Lamphrang Blah na Mawphlang, u bah Victor Ranee na Jirang, u bah Teinwell Dkhar na Shella, u bah Latiplang Kharkongor na Nongthymmai, u bah Pynshngaiñ N Syiem na Mawkhar-Pynthor bad u bah Pyniaid Sing Syiem na Sohryngkham.
Ha kane ka kynti ba mynta ki don 22 ngut ki durkhmat thymmai ha KHADC kiba dang shu jop bad nalor kitei ki don ruh kiba la long teng ki MDC mynshuwa kum u bah Ronnie V Lyngdoh ka Mylliem, u bah Martle Mukhim ka Mawkynrew, u bah Lambor Malngiang ka Nongkrem, u bah Titos W Chyne ka Sohra. Ha ka samoi treikam kaba la dep ha KHADC ki la don 2 ngut ki longkmie bad mynta ka kynti ruh ki don 2 ngut ki longkmie bad kitei ki long ka kong Grace bad ka kong Macdalyne Sawkmie Mawlong kaba dang shu jop na Umsning, mynshuwa ka don ka kong Grace bad ka kong Rona.