rBym sei madan ia ka kaiphod Mookhep Yn khang surok miet ki sengbhalang ka Jaintia Hills

Shillong,
19 Rymphang:
Ki sengbhalang ka Jaintia Hills ki la pynbna ia ka pakhang surok miet ka bym khlem buh por baroh kawei ka Jaintia Hills, namar ba ka sorkar kam shym la sei madan ia ka kaiphod siatiap ha Mookhep kaba ki ladep buh por hynniew sngi kham mynshwa.
Kane ka pakhang surok miet kan sdang naduh ka por 7 baje jan miet haduh ka por 5 baje mynstep ka  25 tarik Rymphang bad kane kan treikam ha baroh kawei ka East Jaintia Hills bad West Jaintia Hills districts kum ka dak ban pyrshah ia ka sorkar halor ka jingpynslem ban sei paidbah ia ka kaiphod siatiap ha Mookhep ha kaba ar ngut ki mynsiem briew ki la iap myn shemsnem ha ka jingshah siat ha ki Pulit.
Ki san tylli ki kynhun sengbhalang kiba la khot ia kane ka pakhang surok miet ki kynthup ka Ri Jaintia Youth Federation (RJYF), ka Meghalaya People’s United Front (MPUF), ka Hynniewtrep Achik National Movement (HANM), ka Jaintia Students Movement (JSM) bad ka Hynniewtrep National Youth Front (HNYF).
Ia kane ka rai ban khot pakhang surok miet ki sengbhalang ki la shim hadien ba ka sorkar kam shym la jubab ia ka jingbuh por jong ki shi taiew ban sei madan ia ka kaiphod.
 ”Ngi la rai ban khot pakhang surok miet ban pyrshah ia ka sorkar ba ka pynslem kai ia ka por ban pyllait paidbah ia ka kaiphod”, la ong ki kynhun sengbhalang ha ka jingpyllait khubor hynne ka sngi Palei.
Ki sengbhalang ki la dawa ba dei ban aiti noh ha ka CBI ban tohkit ia kane ka jingjia namar ba ka jingtohkkit ba la thung ka sorkar kam shym la nud ban sie madan ia ka kaiphod ban pynshisha ia kiba donkti ha kane ka jingjia.
Ki sengbhalang ki la kynnoh ba kane ka jingpynslem ka sorkar ia kane ka kaiphod ka long ban buhrieh ia kito kiba donkti ha kane ka kam.
Ia kane ka jingtohkit la khlieh da u Additional District Magistrate (ADM) ka West Jaintia Hills u bah  SS Syiemlieh hynrei haduh mynta ym pat shym la pynbna ia ka kaiphod jingtohkit.
Kane ka jingshah siat ha Mookhep ka la jia ha ka 24 tarik Nailur 2014 ha kaba ar ngut ki briew ki la iap kiba kynthup ia ka kong S Phawa bad u D Siangshai ha ka por ba mpynlong jingiakhih ka MIPRL ban pyrshah ia ka jingkhang tih dewiong ka NGT  ha kane ka jylla Meghalaya.