Nongstoin, 16 ‘lyngkot:
Ha kawei ka jingjia kaba sngewsih kawei ka longkmie kaba la tip kyrteng kum ka kong Yoris Lyngkhoi 42 snem ka rta na ka shnong Siejlieh, ka la khlad noh hashen hadien ba ka kali kaba ki shong ka la shah tynrah noh ha kawei ka trok ha ka shnong Tiehsaw Khyllem. Katkum ka tyllong khubor na ki pulit ka Nongstoin la ong ba katei ka jingjia ka la jia mynta ka step ha kapor 11:30 katba katei ka kali tourist kaba don ia u number ML 06 5629 ka dang wan na ki thain Mairang, hynrei tang mar iapoi ha katei ka jaka kawei ka trok ka bym shym la ioh ia u number, kaba la bud nadien katei ka tourist kala leit ban tynrah bad rat ia katei ka kali bad phet krad ruh na katei ka jaka hadien katei ka jingjia.
Shuh shuh ha katei ka jingjia ar ngut ki briew ki la mynsaw jur bad kitei ki kynthup ia u draibar ba niah ia katei ka kali tourist ia kaba la tip kyrteng kum u Trasfull Wahlang 36 snem ka arta na ka shnong Tyllang katba kawei pat kadei ka pyrsa kurim jong katei ka longkmie kaba la khlad kaba ka tip kyrteng kum ka Maxlinda Nongbak 20 snem ka rta ha kaba la pynkit noh ia ki mar mar sha Shillong.
Katba ki lai ngut kiwei pat ki la shu mynsaw malu mala bad kitei ki kynthup ia u Baldon Syiem, Donbok Paliar bad u Apstarboy Nongkhar bad la pynkit ia ki sha ka Markasa PHC bn ai ia ka jingsumar bad tang hadien katto katne por ba la dep ban sumar la pyllait noh ia kitei ki lai ngut kiba la shu mynsaw malu mala.
Na ka liang jong ki pulit ki la pyrshang ruh ban thwet jur ia katei ka trok ha kaba ki la pynlong ruh ia ka jingpyap shrip ha man ki lad, hynrei katei ka trok ka la leit ban rieh noh khlem da wan mih paw shuh sha ki jaka bala pynap shrip da ki pulit bad ha kaba iadei pat bad ka met jong katei ka longkmie ki pulit kila dep ban phah sha Civil Hospital Nongstoin ban pyndep ia ka post mortem.
Phi don ban ong eiei?