Rat ia ki nongdie madan ban kylluid ki lynti iaid kjat

Shillong, 11 Naiwieng:
Ka High Court ka la pynmih ia ka hukum mynta ka sngi ba dei ban rat naphang ia ki nongdie madan ban pynkylluid ia ki lynti iaid kjat bad ki surok bah kiba la ju shah pynwit bad pynkhapngiah ha ki nongdie madan. U Deputy Commissioner ka East Khasi Hills u la pynbna paidbah ba katkum katei ka hukum ka High Court kaba la pynmih mynta ka sngi WP(C). No. 229/2015, la hukum ia ka ki bor pyniaid District East Khasi Hills, Chief Executive Officer, Shillong Municipal Board, Shillong ki dei ban phah ia ki majistor, ki pulit, bad ki ophisar ban peit ba kan ym don ka jingpyn khap ngiah ia ki lynti iaid kjat bad ki surok bad ki dei ruh ban pynthikna ba yn ym don shuh ki nongdie madan. U DC u la hukum ia baroh ki nongdie madan ba kin pynthylli noh ia ki jaka iaid kjat bad na surok bah bad lada kim leh kumta kin ngat ha ki kyndon aiñ.
Lah ban kdew ba ha ka 8 tarik mynta u bnai ka Meghalaya High Court ka la thaw ia ka komiti ban sorbe bad ban jurip ia ka nongbah Shillong baroh kawei bad ban peit bniah ruh ia ka jingjyllei ki nongdie madan kiba klun lut ia ki lynti iaid kjat bad ki surok bad ia katei ka komiti la khlieh da u DC ka EKH kum u Chairman bad ki dkhot jong ka ki kynthup ia u SP East Khasi Hills, CEO Municipal bad Shillong Cantonment Board. Ka High Court ka la ai bor ruh ia katei ka komiti ban peit jaka shawei pat ia ki nongdie madan.