Rapido – Shong ei ha ki kali ar shaka ha Shillong, ha ka sngi thep vote

Shillong:Ha ka jingpyrshang kaban wanrah shibun ki jingkylla kaba thmu ban pynsuk ia ka leit ka wan jong ki nongthep vote bad ban pynbun ia ka jingiashim bynta jong ki, ka Rapido, kaba long ka app kaba paw bha ha India ha kaba ki briew ki lah ban pyndonkam ban book ia ki kali kamai ar shaka, ka la iatreilang bad ka Meghalaya State Election Commission ban wanrah ia ka sienjam treikam ba la tip kum ka “Sawaari Zimmedari Ki”. Kane ka jinglam khmat ka long ban nang kham pynsuk ia ka leit ka wan jong ki nongthep vote ha kane ka sien jied nongmih khmat ka India 2024 ne ka Indian General Elections 2024, khamtam hangne ha nongbah Shillong.

La pynbeit ba kane kan treikam ha ka 19 tarik U Iaiong, ha kane ka sienjam treikam yn iohi ba ka Rapido ka wanrah ka jingtyrwa ban ai shong ei ha ki kali kamai ar shaka jong ka ia ki nongthep vote ba don kylleng ki jaka ha Shillong, ban iarap ia ki ba kin poi da kaba suk sha ki jaka thep vote khlem kano kano ka jingeh. Lyngba ka jingpyndonkam ia ka code “VOTENOW” ha ka Rapido app, ki nongshong shnong ki lah ban ioh ban shong ei ia ki ar shaka ha ka sngi thep vote, da kaba pyntikna ba man la I nongthep vote in lah ban pyndep ia ka hok ba la bynshet ha ki ha ka synshar paidbah khlem kino kino ki jingeh ha ka liang ka pisa pilain.

Haba pynpaw ia ka jingtrei ba radbah jong ka kompany ban leh eiei na ka bynta ka bha ka miat ka imlang sahlang, U Co-founder ka Rapido U Pavan Guntupalli, u la ban jur halor ka jingkongsan jong kane ka sienjam treikam ban nang kham pynkhlain shuh shuh ia ka synshar paidbah. U Guntupalli u la pynpaw “Ka jingthmu jong ngi ka long ban wanrah ka jingsuk ha ka jingthep vote na ka bynta man la iwei pa iwei I nongshong shnong jong ka Shillong ha ka sngi thep vote ne ka Indian General Election 2024. Da kaba wanrah ia kine ki jingtyrwa ban ai shongei ha ki kali ar shaka kiba kamai, ka pynpaw ba ym tang ba ngi lah ban ai ia ka jingshakri ha ka liang ka jingpynbiang kali, hynrei ka pynpaw ruh ba ngi long kiba trei shitom ban nang pynkhlain shuh shuh ia ka riti synshar paidbah.”