“Rangbah Shnong – Un ioh tulop – U donkam kyrdan pule – Un ngat ha ka ain rti”

Shillong, 13 ‘lyngkot:
U Rangbah Shnong, u dei ban don ka kyrdan pule kaba rit duh, kaba donkam ba un bat ia katei ka kam bad ka dei ruh ban don ka jingsiew tulop ia u. Katei ka long ka rai jong ka Meghalaya High Court, mynta ka sngi,ha ka phang, kaba iadei bad ka bor jong ki Rangbah Shnong. Ka kashari, ka ong ruh ba ka ophis jong U Rangbah Shnong, ka dei ban hap ha ki kyndon jong ka ain wad jingtip paidbah (right to information).
“Ka paw ba kam don ka jing iaid beit, iaid ryntih, ha ka jing pyniaid kaba iadei bad ka riti dustur bad ka rukom treikam, kaba la ai bor da ka ki District Council bad nalor kitei ki ain, ka dei ruh ban don ka kyrdan pule, kaba la buh lem bad ki kyndon, ia kito kiba dei ban ialeh elekshon Rangbah Shnong bad nangta sa ka por treikam jongki, ka jingsiew tulop bad ki kam, kiba dei ban iaid lyngba jong ka bor ki Rangbah Shnong” ong ka jing bishar mynta ka sngi, kaba la pynkut ia ka jingialeh mukotduma, halor ka iktiar jong ki Rangbah Shnong.
Ka dei ha ka 10tarik Nohprah 2014, ba ka Meghalaya High Court, ka la pynduh noh ia ka bor jong ki Rangbah Shnong, ban pynmih ia ki kot ki sla bad kiwei de ki jingai jingmynjur jongki.
Ka High Court, ka kwah ruh ia ka sorkar Jylla, ba kan thaw ia ka ain, na ka bynta ban pynbeit shi syndon ia katei ka bor jong ki Rangbah Shnong.
La tip ba ka kam jong U Rangbah Shnong, ka dei kaba peit ia ka synshar khadar bad ban peit ia ka jing iaid beit jong ki skhim jong ka Jylla bad ka sorkar kmie, kumta ka donkam ban pynhap ia katei ka ophis jong U Rangbah Shnong, ha ki kyndon ka ain wad jingtip paidbah.
Ka Meghalaya High Court, ka kwah ruh ba U Rangbah Shnong, u dei ban hap ha ka jingbatai, ba u dei ban long hi u shakri paidbah, ha kaba un lah ban shah tian bishar ha ki ain jong ka sorkar India, ki ain bamsap bad kiwei kiwei de halor ki kam leh pyrshah jongu. Ka Kashari, ka khang ruh ia kito kiba long pyrshah ri, kiba donkti ha ki kam pyniap briew bad kiwei de ki kam runar, ba kim bit ban shim bynta ha ki kam ialeh elekshon, kumba la thoh ha ki kyndon jong ka Representation of Peoples Act 1951 bad kiwei de ki elekshon sha ki dorbar Jylla.
Ka kashari, ka ong shuh shuh, ba kat haduh ban da don katei ka ain, kaba biang da ka sorkar Jylla, ka hukum kaba la buh da ka kashari, kaba mynshwa, kan dang iai bteng ban trei kam.