Rakhe sngi Radio ka All India Radio Shillong

Shillong,
13 Rymphang:
Ha Meghalaya lem bad ka ri baroh kawei, ka All India Radio, Shillong ka la rakhe ia ka sngi Radio ha ka pyrthei ne ka “World Radio Day” da ki sur jingrwai bapher ba pher ha ka nongbah ha kane ka sngi Thohdieng ha Sri Aurobindo Institute of Indian Culture.
Haba kren kum u kongsan ha kane ka sngi u Principal Secretary ka jylla u Bah P. Kharkong ngor u la ong ba bun ki lad phah khubor kiba mynshwa ki la kylla rim bad kim iaid kam shuh mynta, hynrei ka Radio ka dang iaid kam bad ka nang bit haduh kine ki sngi ban ai ia ka jingshakri sha ki paidbah.
U Bah Kharkongor u la ong ba ia ka sngi Radio ha ka pyrthei la rakhe nyngkong ha u snem 2012. U la ong ba ka long kaba ai mynsiem ban ioh sngew ia ki sur jingrwai bad ka long ruh kum ka dawai ban pynjem ia ka jingpang. Ha kane ka sngi, ka Seven Music Groups ka Laban Presbyterian Choir, ba la pyniaid da u Dr. Rangad ka Nazareth Hospital la pyni ia ka sur rwai kwaiar ha kane ka sngi rakhe kaba kyrteng ka “A Foolish Man” bad ka “In The Fullness of Time” nalor kiwei pat kum ka jingrwai na ka Nongthymmai Presbyterian Choir hapoh ka jingialam u Bah KS Kharkongor ba rwai ka “Ha Khmih U Khun Langbrot U Blei” bad ka “Ka Por Jinglong Samla”.
La ioh ruh ia ka jingrwai na ka Jowai Unitarian Choir ba ialam da u Bah Aiban Manbha Shullai ka “Ki Sngi Barim B’la Leit” bad “Kynmaw Ia I Mei I Pa.
U Bah Kitkupar Shangpliang bad ka kynhun u la rwai “Ka Pyrta Shnong” bad kumjuh ka “Ka Snap Paka Choral Group” ba la pyniaid da u Bah Realley Lyngskor kaba rwai ia ka jingrwai “Im Tip Briew”.