Rakhe sngi kha u MLA bad ki khunswet ha Laitkroh

Shillong,30 Iaiong:
U MLA ka Sohra Konstitwensi u la rakhe leh kmen ia ka lyngkhuh sngi kha ba 46 jong u mynta ka sngi ryngkat bad ki khun swet jong ka Grace Home, kaba don ha ka shnong Laitkroh. 19 ngut ki khunswet, 10 ngut ki kynthei bad 9 ngut ki shynrang ki la ioh ban ia leh kmen lang ryngkat ka ing ka sem u bah Titos Chyne ba kynthup ia ka lok bad ki khun ha ka sngi kha jong u. Ha katei ka ot cake sngi kha u MLA la ia donlang ki bor pyniaid katei ka jaka ri khunswet, ka Khasi Jaintia Christian Mission Society kaba u bah S.k Laoo u dei u President bad u Pastor Rev. ICS Syiemlieh u general Secretary, ryngkat kiwei pat ki dkhot bad u matabor ka Mawjrong.
Haba kren lyngkot ha katei ka jingiakynduh ba kyrpang bad ki khun swet u bah Titos u la ong ba u la don ka jingthmu kham mynshuwa ban wan jngoh ia kitei ki khunswet ha Laitkroh, dei tad mynta ka sngi ba u la lah ban pynurlong ia katei ka jingangnud jong u ban ia kynduh markhmat bad ki. U la ong ba haba u wan ban jngoh ia katei ka jaka ri khunswet u da kwah ruh ban pynlut por kyrpang ban ia kmen lang bad ki, kumta u la jied ia ka ‘sngi kha’ jong u, kum ka sngi ba kyrpang ba un ia kynduh bad kitei ki khunswet.
U S.K Laloo, Preisdent ka seng kaba pyniaid ia katei ka jaka Ri khunswet u la iathuh ba la seng ia katei ka jaka rir khadwei snem mynshuwa, ha kaba la iarap ban pynbit pynbiang ia ki khunswet da ka jingianoh synniang jogn kiba don ka mon sngewbha, u la ong ruh ba ka jinglut ha ka shibnai na bynta iwei i khynnah ka kot sha ka ar hajar tam. U bah Laloo u la iathuh ruh ba ki don ar ngut ki kmie ki ba peit ba sumar ia kitei ki

khynnah ha baroh ki jingdonkam jong ki naduh ka bam ka dih, ka sum ka sait bad kumta ter-ter.
U nongthohkhubor u la ioh ruh ban ia kren bad iwei na ki nongsumar ia kitei ki khunswet, ha kaba i la pynpaw b aim don jingeh eiei ban sumar ia ki, namarba i shim ba ka dei ka kamram jong ki, i la ong ba ka jingeh ka don beit hynrei im pynsngew bad i shim beit bym don jingeh. I la iathuh ba ka kam jong ki man ka sngi ka long ban pynsum pynsait, ai bam ai dih , bad kumta ter-ter.
Ha katei ka jaka ri-khunswet ka don ruh ka skul phareng ka ‘Peniel English School’ ka skul kaba la seng ha u 2005 bad kat nang mih ki snem la kyntiew kyrdan ia ka, katkum ka jingdon ki khynnah skul, ha katei ka skul u bah Laloo u la iathuh ba ki don haduh kumba 200 ngut tam ki khynnah, bad ki nonghikai ki don 10 ngut, ia katei ka skul ruh la pyniaid da ka KJCMS.
Ha katei ka jaka ri khunswet kaba hap hapoh ka Mawphlang Konstitwensi , ki 19 ngut ki khynnah ki dei na ki shnong bapher bapher, bad kiba khambun hi ki dei na Konstitwensi Shella bad Sohra.