Rakhe laitluid ha Nongstoin

Nongstoin, 16 Nailar :
Ha ryngkat lang bad baroh satlak kawei ka Ri bad ka Jylla ha Nongstoin, WKHD ruh la rakhe ia katei ka sngi khraw jong ka Ri kaba 69 ia kaba la pynlong ha Madan St. Peters Nongstoin myn ha ka sngi saitjain jong ka taiew ba la lah.
Ha katei ka sngi u bah Sniawbhalang Dhar u la long u kongsan bad u ba la pynher ruh ia ka lama lai rong jong ka Ri ha katei ka sngi bad hadien ka jingpynher lama la bud sa ka jingia iaid Marchpass jong ki 38 tylli ki parade contingent kiba kynthup ia ki skul, college bapher bapher kumjuh ki NCC bad ki pulit jong ka WKHD.
Shuh shuh ha katei ka sngi la iadonlang ruh ki heh nongpyniaid District, ki ophisar na ki tnad sorkar bapher bapher, ki MLA, MDC ki Riew Rangbah ki khynnah skul, ki kmie ki kpa, ki nonghikai bad kumjuh baroh ki nongshong shnong jong ka District Head Quarter kila iawan ban iadon bynta ha katei ka jingrakhe ia katei ka sngi ba khraw jong ka Ri.
Ban pyniphuh ia katei ka jingrakhe ia ka sngi laitluid ka Ri, shibun ki prokram shad bad rwai la iashim bynta shitrhem da ki khynnah skul bad college bapher bapher bad ha katei ka sngi kala don ruh ka jingsam khusnam sha ki Asha, ki nongrep bad kiwei kiwei bad kala don ruh ka jingialehkai phutbol paralok hapdeng ki ophisar jong ka District pyrshah ia ki nongpyniaid shnong ha kaba ia ka jingjop la ioh khur da ki nongpyniaid shnong.
Ha katei kajuh ka sngi la rakhe ruh ha manla ki Block bapher bapher hapoh ka WKHD.