| Shillong: Ki nongtrei mon sngewbha ha ka jingsiew kaba rit bha, kiba la synniang shibun ha ka liang ban kyntiew ia ka koit ka khiah, khamtam haka thain nongkyndong, ia kiba la ju tip kum ki Accredited Social Health Activist ne ki ASHA, mynta u snem ki la kynjoh pura sha ka 8 snem pura, ha ka jingshakri jongki ha kane ka jylla Meghalaya. Shi bynta ban pynsah kynmaw ia kane ka jingkynjoh sha ka 8 snem ka jingshakri jongki, mynta ka sngi, ki la ialum lang ruh ban rakhe ia kane ka lyngkhuh snem kaba 8. Ia kane ka jingiakynduh lang ki ASHA jong ka jylla, kiba hapoh ka shatri jong ka “Meghalaya ASHA Worker Union” la pynlong ha Madan Student, Jaiaw, Shillong, ha kaba la wan iashim bynta da palat 8 spah ngut ki ASHA na kylleng ki District ka jylla. Ha kane ka jingialang la iadon ryngkat ruh u nongai buit ba rangbah duh jong ka sorkar jylla u Dr. D.D Lapang bad u Bah R. Thabah uba long u President jong ka kynhun Master Roll Workers Union. Ha kane ka jingialang ha kane ka sngi, haba kren ha ka jingialang na ka liang u Dr. DD Lapang, ula ai khublei kyrpang ia ki nongtrei ASHA, kiba la synniang shibun na ka bynta ban kyntiew ia ka koit ka khiah haka jylla. Ula kyntu ruh ia ki ba kin iai bteng ka jingshakri kaba rieh na ka bynta ka imlang sahlang, wat la ki ioh ka jingsiew kaba rit bha. |
Phi don ban ong eiei?