Rakhe Khristmas bad snem thymmai u bah Sanbor bad ki kynhun niam

Shillong: U MLA ka South Shillong bah Sanbor Shullai ula pynlong ia ka jingrakhe Khrismas bad Snem lypa da kaba khot ia ki kynhun niam bapher bapher ba don ha thain Laban.

Ha kane ka sngi, la pynlong ia ka jingrakhe da ka Monitoring Cum Implementation Committee hapoh ka jingialam u bah Sanbor. La pynkup burom ruh ia ka samla Aakriti Chen kaba jop ia ka nam Miss Shillong 2019.
Haba kren ha kane ka sngi, u bah Sanbor ula ong ba kumba ju leh naduh mynshwa, shwa ban rakhe Khrismas la ju pynlong ka jingpynkhuid shnong ha ka thain Laban.
“Ha Laban baroh ki jait niam, kila ia burom iatreilang baroh ban rakhe ia kano kano ka jingrakhe ki jait niam”, la ong bah Sanbor. 
U bah Sanbor  ula ai jingiarap pisa sha ki 16 tylli ki Committee ki Balang, ki kynhun niam bapher bapher mar 21 hajar tyngka.
“To yn iapynneh bad pynkhlain ia ka jingsuk jingsain”, ula ong.
Shwa ia kane, la pynlong ruh ia ka jingbuh syntiew ha u mot u Patogan N Sangma, u Tirot Sing bad u Kiang Nangbah.