Rakhe ka Synod College ia U Thomas Jones I

Shillong, 22 Jylliew:
Kum ka dak kyn maw burom ia “U Kpa ki dak thoh Khasi”, ka Synod College lyngba ka Khasi Department ka la pynlong ia ka prokram kyrpang halor u Thomas Jones I mynta ka sngi halor ka phang pdeng “U Synniang bad ka Jingshah shitom u Thomas Jones I”. Ia kane ka phang la kren da u Rev. (Dr) E. S. Langstieh uba long ruh u kongsan ha kane ka sngi.Ha shuwa katei ka phang kren ka la don ka jingpynher ia ka Lama U Thomas Jones, kum ka dak ka jingkynmaw burom ia ka jingdap ba 175 snem ia ka jingwan iuh kjat une u Mishoneri. La ioh ban pynher ia ka lama da u Kongsan Rev.(Dr) E. S. Langstieh la ioh ruh ban buh ia u Syntiew halor u mot jong u Thomas Jones hi uba don ha phyllaw jong kane ka College.
Haba kren halor u Synniang bad ki kam u Thomas Jones I, u pastor Langstieh u la ong ba u Blei u ba la phah ia u Thomas Jones, u shakri uba biang ia ka jingdonkam kyrkieh jong ka jaitbyn riew. U Thomas Jones u la sei ia ka jaitbynriew khasi na krem bad na khlaw, u la rah sha lynti bah ba ka jaitbynriew ka la man khraw.U Thomas Jones u la noh synniang ruh sha ka jaitbynriew da kaba u hikai ban nang kham pynbha shuh shuh ha ka kam thangshun, ka rukom rep phan, ka kam misteri, kam stah maw saiñ nar bad hikai dih dawai ia kito kiba pang.
Nalor kum ‘U Kpa ki dak thoh khasi’, U Thomas Jones u dei ban ioh hok ia ka nam ka burom kum u nongseng skul bad nongsaiñ dur ia ka jaitbynriew ha ka por ba donkam eh.“U Thomas Jones u la dei ban shah ia ki jingpait dohnud bad lwet ka mynsiem na ka jingkhlad noh ki khun bad ka kurim jong u ka Ann Jones, hynrei u la shakri ia ki Khasi bad ki shakri Sorkar kum u Hary Inglis pat ki ba bishni ia u, naba u hikai khaïi ia ki khasi. Dei na kane ka daw ba pynlong ia u Hary Inglis ban wan kput ia ka jingim jong u na ka daw ka myntoi shimet”, la ong u Pastor Langstieh.
“ Hynrei u Thomas Jones u ieng triang khlem ran dien bad ynda ki nongshun jong u ki la beh thong ia u, u la hap ban phet rieh sha Kolkata bad iap hangto. Wat la u la iap ha ka snem 1849 ka nam jong u pat ka dang iwbih suhsieng ha kine ki lum Khasi haduh mynta”, la ong shuh shuh u Pastor Langstieh. Ia kane ka jingialang la pyniaid da I Vice Principal Prof. C. Pariat, ha ka jingia donlang I Prof. B. Raplang. La pynshngaiñ ia kane ka jingialang da ka jingdonlang jong ki nonghikai bad ki khynnah pule jong kane ka Kolej kiba la ia ruh ki jingrwai bad ki jingpule poitri.