Rakhe ka shnong Syllei-u-Lar, ia ka jingdap 30 snem ka shnong

Nongpoh:Myn hynnin ka sngi Saitjain, ka shnong ka Syllei-u-Lar, kaba don ha ka thain Bhoirymbong bad kaba hap ha Raid Mawbuh, Hima Mylliem ha Ri Bhoi, ki la pynlong ia ka jingrakhe kaba kyrpang halor ka jingdap ba 30 snem ka shnong, kata naduh ba la seng ia ka ha u snem 1990.

Haba iadei bad katei ka jingdap ba 30 snem katei ka shnong, u Bah Kronding Nongbsap, Rangbah shnong, u la batai lyngkot halor ka jingsdang jong katei ka shnong, ha kaba katkum ka jingiathuh jong u, la ong ba katei ka shnong la seng da u Bah Y. Shadap (Bam Kwah ha dwar u Blei) lem bad katto katne ngut ki riew rangbah bad naduh katei ka por, ka shnong ka la iaid suki par suki tad haduh ba kan da long kumba ka long mynta.

Kiba la donlang ha katei ka sngi, ki kynthup ia u Bah John Kharshiing, uwei na ki riew rangbah ba la paw ha ka jylla, u samla Everist Marsing, u Bah Bandary Ryntathiang lem bad kiwei de ki riew rangbah jong katei ka thain. Nalorkata la iohi ba baroh ki paidbah ka shnong, naduh ki Tymmen ki Kro, ki Rangbah, ki samla bad ki heprit, ki la iamih ryntih ha katei ka jingrakhe bad kata ka long ban pynpaw ia ka jingkmen, halor ka jingdap ba 30 snem ka shnong.