Rakhe ia ka sngi ki nongthohkhubor

Shillong,15 Naiwieng:
Ka Shillong Press Club ryngkat ka jingiatreilang bad ka in Meghalaya Information and Public Relations kan pynlong ia ka jingrakhe ia ka sngi ki nongthoh khubor ka ‘National Press Day’ lashai ka sngi ka 16 tarik u Naiwieng. Ka phang pdeng ha katei ka jingrakhe ka long kumba la bthah da ka Press Council of India ka dei ka “kamram ki khubor ban shakri ia u paidbah”.
U lamphang ka ing dorbar, u AT Mondal un plie ia ka jingialang ha ka por 11 baje mynstep ha Shillong club bad ka ban bud sa ka jingai jinghikai ia ki nongthohkhubor kiba leit ban lum khubor bad kiba shong ha ophis, bad hadien katei kandon ruh ka jingiakop thoh khubor na ka bynta ki nongthohkhubor bad ki nongpule khubor. U Aloke Thakur, uwei na ki nongthohkhubor ba la rangbah na Mumbai uba la ju thoh ia bun ki khubor bad uba la ju hikai ruh ha ki skulbah bad kolej , uba long ruh u coach ha karma ki nongthohkhubor un long u nongpynlong ia kitei ki prokram.
Ki Editor bad ki nongthoh khubor rangbah kin peit ia ki jingthoh ba ki nongthoh khubor ki thoh bad ia ki nongjop yn ai khusnam da ka pisa , ia ki nongjop yn pynbna ha ka jingialang ka ban long ha ka por janmiet 6 baje ha kaba ka Myntri ka kam pohing ka kong Roshan Warjri kan long ka kongsan, u bah Paul Lyngdoh kum u symbud kongsan bad u Additional Chief Secretary u Bah PB Warjri un ai jingkren kum u kongsan uba la khot kyrpang. La khmih lynti ba baroh ki nongthoh khubor kiba leit lum jingtip bad ki ba shong ha ophis ba kin ia poi khnang sha katei ka prokram.