Rakhe ia ka sngi kha u Bob Marley da ka put ka tem ha Jowai

Jowai, 7 Rymphang:
Shi tyllup ka pyrthei ka la rakhe ia ka sngi kha jong u nongrwai ba pawnam uba la khlad noh u Bob Marley da ka jingpynlong da ka rynsan ia put ia tem,ha kane ka jylla ruh la rakhe ia ka sngi kha u Bob Marley da ka put ka tem bad ka rwai ka siaw kaba la long ha Madan Lyngkein Ialong. Ia katei ka rynsan ia put ia tem la pynlong da ka Jaintia Reggae Music,  ka Pulse Event bad ka Samsawa Production.
U bah RG Lyngdoh u la long u kongsan ha katei ka sngi saitjain ka 6 tarik u rymphang bad haba ai jingkren ha katei ka sngi u bah R.G Lyngdoh u la ong ba ba balei ki briew ha shityllup ka pyrthei ki lehburom bad kynmaw ieid ia u Bob Marley ka long ba u dei u nongrwai ba kham pher u ba wanrah ia ki jingkylla haka imlang ka sahlang da ki jingrwai ki jong u,haba ngi sngap ia ki jingrwai ki jong u, ukren ia ka jinglong ka jingman ha ka imlang ka sahlang,ki jingrwai ki jong u ruh ki hikai ia ngi kumno ba ngin ieng ha la ki jong ki kjat bad ruh kumno ban wanrah ia ka jing iasngewthuh jingmut da ka jingieid.
Ha katei ka jingrakhe la wan ban ia shim bynta da ki spah ngut ki paidbah na kylleng ka jylla bad ki kynhun kiba la pynshongshit ha katei ka sngi ki long routh 44, Lynx, Dewdrop , u Sam Shullai bad ki paralok jong u kiba la rwai da ki jingrwai jong u Bob Marley.