Rakhe 36 snem ka KSU lem bad ki nongialam barim

Shillong, 20 Lber:
Ka Khasi Students Union (KSU) ha kane ka sngi Palei ka la rakhe ia ka jingdap 36 snem ka seng naduh ba la seng ia ka bad ka la rai ban iai trei na ka bynta ka bha ka miat jong ka jaitbynriew.
“Haduh mynta, ka nong rim jong ngi ka ieng beit ban pyntreikam ia ka Inner Line Permit (ILP) ban iada ia ka jingwan tyllep ki briew nabar”, la ong u president ka KSU u samla Daniel Khyriem haba kren ha kane ka jingialang ban rakhe ia ka jingdap 36 snem ka seng hajan All India Radio.
U samla Khyriem u la ong ba ka KSU kam kynran dien satia na ka jingdawa ban pyntreikam ia ka ILP wat hadien saw bnai ba la pynlong ia ka jingiakhih,.
“Ngi kyntu bad kyrpad ia ki paidbah ban ai ia ka jingkyrshan ha ka jingialeh jong ka seng ban pynrulong ia ki jingdawa”, la ong u samla Khyriem.
U president barim ka KSU u Bah Paul Lyngdoh, u bah Michael Syiem, bad u Bah Samuel B Jyrwa ki don lang ha kane ka jingrakhe dap 36 snem ka seng.
U Bah Paul Lyngdoh uba dei ruh mynta u MLA, u la ong ba ka KSU ha ki 36 snem ka jingiaid lynti ka la lah ban iaid bun ki diengpynkiang bad ka la pynmih shibun ki nongialam ha ka ri bad ka jylla.
“Bun ki nongialam ki wan bad ki leit hynrei ka KSU ka ieng beit ha ka nongrim ka bym lah satia ban shim noh na ka dohnud jong ki dkhot ka seng watla kim don shuh ha ka seng ruh”, la ong u Bah Lyngdoh.
U Bah Lyngdoh u la kyntu ia ki dkhot ka seng ban long kiba khlain ban iakhun pyrshah ia ki jingeh kiba wan ha ka lynti iaid jongki ban iada ia ka ri bad ki paidbah ka ri Khasi..
Katba u Bah Michael Syiem u la ong, ka KSU ka long kum ka stieh ban iada ia ka ri bad ka wait lam ban iakhun ia ki nongshun jong ka ri.
U Bah Syiem u la kyntu ia ki dkhot ka seng ban nym niew bein ia ki paidbah hynrei ban pynthikna ba ki briew kim dei ban niuhroit ia ka hok ki trai jaka trai muluk.