Rakhe 25snem ka Seng Samla Seng Khasi Upper Shillong

Shillong, 8 Jymmang:
Ka Seng Samla Seng Khasi Upper Shillong ka la pynlong ia ka jingsdang ban rakhe ia ka Lyngkhuh dap 25 snem jong ka ha kaba la long ha ka 7 tarik u Jymmang 2017 ha Iing Seng ha Laimer shiteng ha ka por 11 baje mynstep. Ha kane ka sngi la sdang shuwa da ka Nguh ka Dem da U Rangbah Noken Kharbuli nangta pynbud sa ka kyntiew lama da U Rangbah Kran Ryntathiang uba long U Nongseng ia ka Seng Samla Seng Khasi Upper Shillong ha ryngkat ka jingdon lang ki dkhot ba nyngkong ka Seng Samla, ki dkhot ka Seng Khasi Kmie Upper Shillong, ki longkmie, ki samla shynrang bad kynthei bad khamtam ki khynnah jong ka Seng Khynnah ka Seng Khasi Upper Shillong.
Ha kane ka sngi la ioh ruh ia ki jingkren na U President nongseng U Rangbah Kran Ryntathiang, uba la batai bniah shaphang ka jingsdang bad ka rukom treikam jong ka Seng Samla ha kine ki 25 snem bad kumjuh u la ai mynsiem ia ki samla baroh khamtam ia kiba dang bat kam ha kane ka kynti mynta. La ioh ruh ia ka jingkren pyrsad mynsiem ia ki dkhot da U Rangbah H. R. Kurbah ha ryngkat ka kitbok kitrwiang ia ki samla, U samla Rapborlang Syiemlieh uba long u u President ba mynta jong ka Seng Samla u la ai ia ka jingpynshai ia ka rukom treikam jong ki samla mynta. La ioh ia ki jingpynbna ia ki jingialehkai bapher bapher na ka bynta kane ka jingrakhe da u Chairman ka Celebration Committee u Rangbah Kyrshanbor Rynjah, ong ka kyrwoh ba la phah da u Secretary ka Committee u Rangbah K. Kharwanlang.