Shillong: U James Sangma, myntri ka tnad khajna jong ka Sorkar jylla, mynta ka sngi u la kular ba un trei shitom ban pynduh pyndam noh ia ka Meghalaya Regulation of Gaming Act 2021, kaba la wan rah da ka Sorkar Meghalaya Democratic Alliance (MDA) hapoh ka jingpeit jingkhmih jong u, ia kane ka tnad.
Haba kren ha ki lad pathai khubor, na ka liang u Myntri u la ong “Ha u snem la dep la wan rah ia ka Meghalaya Regulation of Gaming Act 2021, kum shibynta ban pynkiew ia ka kam jngohkai pyrthei, ban ioh lum khajna bad ban pynioh kam ia ki briew na ka jylla”.
“Bad ka jingthmu jong ka tnad khajna jong ka Sorkar jylla, ban wan rah ia kane ka act ka long ban tehlakam ia ki kam khalai kiba la don lupa ha ka jylla kat kum ka ain“ u la bynrap.
U Sangma u la ong “Hapoh kane ka Act ka la don ruh ka jingai jingmut ban wanrah ia ka Casino ha ka jylla, hynrei ha kine ki bnai kiba la dep ka la mih ka jingpyrshah na kiba bun balang namar ka jingsheptieng ia ka jingshah ktah lada don kane ka act”. “Ha kine ki bnai, na ka liang jong nga, nga la shim khia ban ia kynduh ia ki briew kiba don bynta lang ha ka imlang sahlang, kynthup ia ki nongïalam niam, nongïalam ki sengbhalang, nongmihkhmat jong ki riewpaidbah, ki nongïalam jong ki dorbar shnong, ki nongïalam ka District Council bad kiwei kiwei”u la bynrap. U la ong ruh “Ha kine ki jingïalang, nga la sngewthuh ia ka jingsngewkhia jong kiba bun balang bad ia ki jingshah ktah na kane ka Act bad dei na kane ka daw ba na ka liang jong nga nga la shim rai ba dei pynduh pyndam noh ia kane ka Act”. U la bynrap “Na ka liang jong nga, ngan trei shitom ban pynthikna ba ia ka Meghalaya Regulation and gaming Act 2021 dei ban pynduh pyndam noh, namar ba kan don ka jingktah ka ba jur ia ka jylla”.
Phi don ban ong eiei?