Rai u Dr. Khongjee ban ym pan tiket Congress na Sohra

Shillong, 11 Jymmang:
Ha ki khyndiat sngi ba la dep u MLA barim ka Sohra u Dr.P.W Khongjee u la lum jingialang ia ki nongialam ba hakhmat jong u ban pyrkhat na bynta ka elekshon 2018, ki lad khubor ki la iathuh ba katei ka jingialang ka la long ha ka shnong Khrang- Khad-ar Shnong. La iathuh ba ki don kumba 30 ngut ki nongialam u Dr.Khongjee kiba la poi sha katei ka jingialang. Ki lad khubor ki la iathuh ruh ba ha katei ka jingialang u Dr.PW Khongjee u la kren shai ha ki nongbud jong u ba ha ka elekshon 2018 un ym ia khun na ka seng Congress bad u la pyni ruh ia ka nongrim balei um treh ban ia khun na ka seng Congress.
La iathuh ba ki daw kiba u Dr. Khongjee u la sei ba um kwah shuh na ka seng Congress ka dei ba u sngewthuh ba ka Congress kan ym lah khie khlieh shuh ha u 2018 bad kawei pat ka daw kaba u la pynshai ha ki ka dei namarba um kwah ban ia knieh tiket da kaba ong ba u la sngewthuh lypa ba ka tiket kan ym leit sha u. Shuh shuh ki lad khubor ki la iathuh ba u la pan ia ka rai na ki nongkyr shan jong u sha kano ka Party un leit iasoh hynrei kim shym la lah ban ai ia ka rai bad ki la bynshet ha u hi kum u nongialam ba un shim ia ka rai la un leit BJP ne un leit sha kawei pat ka Party kat kaba u sngew iahap.
Kiwei pat ki lad khubor ki la iathuh ba nyngkong u Dr.Khongjee u la don jingthmu ban leit ia soh sha ka seng BJP bad ban ia khun na katei ka seng ha u 2018 hynrei katei ka jingthmu jong u ruh ka la pulom noh hadien ba u President jong ka Seng Khasi u bah Bantei Nongrum u la pynbna ban shongthait noh na ka kam Seng bad un leit sha ka lympung ia khun elekshon ha u 2018 bad la sngewthuh ba un ia khun na ka seng BJP.
Lah ban kdew ba watla ka elekshon ka dang jngai hynrei ka lyer ia knieh tiket ha Sohra konstitwensi ka la jur bha ha kine ki khyndiat sngi ba la leit hynrei da katei ka rai jong u Dr.Khongjee la sngewthuh ba ka tiket ka seng Congress ha Sohra kan leit da kaba suk sha u bah Donevan Kharwanlang u MDC ba mynta ka seng Congress na Sohra namarba ym shym la don shuh kiwei pat ki kyrtong kiba thmu pan tiket Congress.