Shillong:Hadien 13 snem kynthih ba um don shuh ha ka seng saiñ pyrthei, ha kane ka kynti kaba mynta, u Bah RG Lyngdoh u ba dei u nongialam barim ka seng Congress bad u ba la bat teng ruh kum u Myntri ka tnad kam pohïing ka jylla, u la rai ban wanphai biang sha ka saiñ pyrthei bad ban pyniasoh biang ialade bad ka seng Congress.
U Bah RG Lyngdoh u la ong kaba la pynlong ia u ban wanphai biang sha ka politik ka long hadien ba ki la katto katne ngut ki riew rangbah bad ki riew shemphang jong ka jylla kiba la pynbor ia u ban phai biang sha ka politik.
Haba kren sha ki lad pathai khubor ha ka sngi Balang kata ka 8 tarik u bnai Nailur 2021, u Bah RG Lyngdoh u la ong,”Haba nga la iohi ia ka jinglong jingman jong ka jylla ha baroh ki liang, kiba bun ki briew ki khuslai ia ka ban sa wan kumta ka la pynlong ia ki ba kin wan ban iakren bad nga bad baroh ki don ia kajuh ka jingsngew”.
U Bah RG Lyngdoh u la ong ruh ba u President bathymmai ka seng Congress ka jylla kata u Bah Vincent H Pala u la iawer ia u ban wanphai biang sha ka politik bad sha ka seng Congress. Haba kylli ia u Bah RG Lyngdoh la ka seng Congress ka don jingkyrmen ne em ban jop ia ka elekshon ha u 2023, u Bah RG Lyngdoh u la ong ba u don ka jingkyrmen ba kan jop bad u la rai ruh ba un ai kti lang ha baroh ki liang.
U Bah RG Lyngdoh u la ong, “Ka jingiapher mynta ka long ba une u President bathymmai jong ka seng u dei u nongialehkai u ba ju kwah ban iasyllok shwa bad ban wanrah lem ban long kawei kaba long kaei kaei kaba sngewtynnad. Lehse kane ka dei kaba khlem don mynshwa ha ki por ba la leit noh bad kane kan wanrah ia ka jingbha”. U Bah RG u la ong ruh ba u la shim ka sienjam kumno ban pyniatylli ia ki seng riewlum ba kin ieng ha kawei ka lama hynrei u la ong ba u la lap ba ka long kaba eh haduh katta katta ban pyniatylli ia ki kumta u hap ban phai beit sha ka seng Congress.
U Bah RG Lyngdoh u la ong, “Nga la dep ban iakren bad ki seng riewlum hynrei nga lap ba ki dang im bun pynban ha ki por ba la dep. Nga artatien ia ka jinglah ka jong ki ban wanrah bad nga suk shibun bad ka seng Congress”. Shuh shuh u Bah RG Lyngdoh u la ong ba u khlem wan sha ka seng saiñ pyrthei na ka bynta ban khwan bor ne ban paw pyrthei hynrei ban rung hapoh ka kynhun kaba lah ban ai ia ka jingdonkam kaba ki paidbah ki donkam. Haba kylli ia u Bah RG Lyngdoh balei u khlem jied ban rung sha ka National People’s Party (NPP), u la ong namar ba ka seng NPP ka la ialam ia ka jylla ha ka lynti kaba bakla bad um treh ban rung sha ka seng BJP, ka long namar um sngewiahap bad ki mat treikam jong katei ka seng.
U Bah RG Lyngdoh u la ong ruh ba mynta u dang rung shwa ha ka seng Congress bad ia ka jingiakhun ilekshon un sa iakren pat kham hadien.
Phi don ban ong eiei?