Rai pynjlan ia ka soskular, ka ANVC bad ka sorkar India

Shillong, 28 Lber:
Ka sorkar pdeng ha kane ka sngi Thohdieng ka la rai ban pynjlan ia ka soskular lai liang ba iateh ne ka Tripartite Suspension of Operations (SoO) hapdeng ka sorkar jylla, sorkar pdeng bad ka seng lehnoh ANVC sa shi snem.
Kane ka rai ban pyn jlan kan treikam noh naduh ka 1 tarik Iaiong, 2014. Lah ban kdew ba ka soskular ka la kut ha ka 31 tarik Lber 2014.
“Ngi la rai ban pynjlan ia ka soskular ha ka jingialang jong ka Joint Monitoring Group,” , la ong u director ka tnad Home Affairs ba peit ia ka North East u JPN Singh hadien ba la wai ka jingialang mynta ka sngi ha Shillong.
U Singh u la iathuh ba la iakren ruh ha kane ka jingialang ia ka jinglong ka suk ka sain ha ka jylla khamtam ha rilum Garo.
Haba pyrshang ban iakren ia u Additional Chief Secretary u KS Kropha uba don ha ka jingialang, u la pynthikna ba ka soskular bad ka ANVC la pynjlan.
Ha kane ka jingialang la iashim bynta saw ngut ki nongialam ka ANVC ba ialam da u general secretary u Wanding R Marak.
Ha ka 24 tarik Naitung, 2004 ka sorkar pdeng ka la pynsangeh ia ka jingkhynra ia ki dkhot ka ANVC ban plie lad ia ka jingiasoi ia ka jutang.
Kane ka soskar ka sorkar bad ka seng lehnoh ANVC ka sahteng ha kti ka sorkar pdeng haduh kine ki sngi.